ދިވެހިރާއްޖެއަށް ފަތުރުވެރިން ޒިޔާރަތްކުރި އަދަދު މިދިޔަ އަހަރުގެ މި މުއްދަލާ އަޅާބަލާއިރު 9.5 އިންސައްތަ އިތުރުވެފައިވާކަން ފަތުރުވެރިކަމާބެހޭ ވުޒާރާއިން ނެރުނު ތަފާސް ހިސާބުތަކުން ހާމަވެއްޖެއެވެ.

ފަތުރުވެރިކަމާބެހޭ ވުޒާރާއިން އެންމެ ފަހުން ނެރުނު ތަފާސް ހިސާބުތަކުން ދައްކާ ގޮތުގައި މި އަހަރުގެ މި މުއްދަތަށް ރާއްޖެއަށް 1،733،680 ފަތުރުވެރިން ވަނީ އައިސްފައެވެ. މިއީ ސަރުކާރުން މި އަހަރު އަމާޒު ހިފާފައިވާ ދެ މިލިއަން ފަތުރުވެރިން ރާއްޖެއަށް ގެނައުމަށް ކުރާ އުންމީދަށް ލިބުނު ކުރިއެރުމެއްކަން ފާހަގަ ކުރެވެއެވެ.

މި އަހަރުވެސް ރާއްޖެއަށް އެންމެ ގިނައިން ފަތުރުވެރިން ޒިޔާރަތްކޮށްފައި ވަނީ ޗައިނާއިންނެވެ. އެގޮތުން މި މަހުގެ 12 ވަނަ ދުވަހުގެ ނިޔަލަށް އެ ގައުމުން 243،843 ފަތުރުވެެރިން އައިސްފައިވެއެވެ.

ދެވަނައަށް އެންމެ ގިނަ ފަތުރުވެރިން ޒިޔާރަތް ކޮށްފައިވަނީ ރަޝިޔާއިންނެވެ. އެގައުމުން 193،726 ފަތުރުވެރިން ރާއްޖެ އައިސްފައިވާއިރު މި ލިސްޓުގެ ތިންވަނައިގައި އޮތް އިނގިރޭސިވިލާތުން 150،179 ފަތުރުވެރިން ރާއްޖެއަށް އައިސްފައިވެއެވެ. ހަތަރުވަނައިގައި އޮތް ޖަރުމަނުން ރާއްޖެއަށް ޒިޔާރަތްކޮށްފައިވަނީ 133،384 ފަތުރުވެރިންނެވެ.

ފަތުރުވެރިކަމަށް އިގްތިސާދު ބަރޯސާވެފައިވާ ރާއްޖޭގައި މިހާރު 171 ރިސޯޓެއް އޮޕަރޭޝަނަށް ގެނެސްފައިވާއިރު، 14 ހޮޓެލަކާއި، 895 ގެސްޓް ހައުސްގެ އިތުރުން، 154 ސަފާރީ އުޅަނދު ދަނީ އޮޕަރޭޓު ކުރަމުންނެވެ.