އުނދަގޫ ވަގުތުގައި ވެސް ރައްޔިތުންގެ ހައްގުތައް އިސްކުރަން ވިދާޅުވެ ކުރީގެ ރައީސް އިބްރާހިމް މުހައްމަދު ސޯލިހުގެ ސިޓީފުޅެއް ރައީސް ޑރ. މުހައްމަދު މުއިއްޒުއަށް އެރުވިކަން ހާމަވެއްޖެ އެވެ.

ރައީސް ސޯލިހުގެ ވެރިކަން ނިމުނު ދުވަހު ރައީސް މުއިއްޒުއަށް އެ ސިޓީ އެރުވިކަން އެނގިގެންދިޔައީ ރާއްޖެ ޓީވީން މިއަދު ގެނެސްދިން ޕްރޮގްރާމްގައި ރައީސް ސޯލިހު އެކަން ހާމަކުރެއްވުމުން ނެވެ.

އެ ސިޓީގެ ކޮޕީތައް ރާއްޖޭގެ ނޫސްތަކުން ވެސް ހާމަކޮށްފައިވާ އިރު ސިޓީގައި ރައީސް ސޯލިހު ވިދާޅުވީ ރައީސުލްޖުމްހޫރިއްޔާގެ މަގާމަކީ ވަރަށް ބޮޑު އަމާނާތަކާއި އަދި އެހާމެ ބޮޑު މަސްއޫލިއްޔަތެއް ވެސް ކަމަށެވެ.

އެހެންކަމުން އެ މަގާމާ ހަވާލުވާ ކޮންމެ މީހަކު ވެސް އަބަދު މަސައްކަތް ކުރަންވާނީ އެއްވެސް ރައްޔިތަކު ތަފާތުނުކޮށް އިހުލާސްތެރިކަމާއެކު ގައުމަށް ހިދުމަތް ކުރެއްވުމަށް ކަމަށް ވިދާޅުވެފައި ވެއެވެ. ހަމަ އެހެންމެ ކޮންމެ ކަމެއްގައި ވެސް އިސްލާމް ދީނާއި ގައުމީ މަސްލަހަތު އިސްކުރަން ވެސް ނަސޭހަތްތެރިވެ ވަޑައިގެންފައި ވެއެވެ.

ރައީސް ސޯލިހު ވިދާޅުވީ އުނދަގޫ ވަގުތުތަކާވެސް ކުރުމަތިލާން ޖެހޭނެ ކަމަށާއި އަދި ތިމާ ބޭނުންވާ ގޮތަށް ކަންކަން ނިންމަން ދަތިވާ ވަގުތުތައް ވެސް އަންނާނެ ކަމަށެވެ.

"އެއިން ކޮންމެ ވަގުތެއްގައި ވެސް އިސްކުރަން ވާނީ ރައްޔިތުންގެ ހައްގުތަކާއި ގައުމީ މަސްލަހަތެވެ. ތިމާއަކީ ރައްޔިތުންގެ ހާދިމެއްކަން ހަނދުމަ ފުޅު ބަހައްޓަވާށެވެ. މަޝްވަރާ ކުރައްވާށެވެ." ރައީސް ސޯލިހު ވިދާޅުވެފައި ވެއެވެ.