ރާއްޖެއަށް މިހާރު ކުރަމުންދާ ވިއްސާރައިގައި އެކި ރަށްރަށަށް އެކިވަރުގެ ގެއްލުންތައް ވަމުންދާކަމަށް ޑިޒާސްޓަރ މެނޭޖުމަންޓް އޮތޯރިޓީން ބުނެފިއެވެ.

އެ އޮތޯރިޓީން މިރޭ ބުނީ، މިހާރު ކުރަމުންދާ ވިއްސާރައާއި ގުޅިގެން ދެކުނުގެ އަތޮޅުތަކަށާއި، މެދު ރާއްޖެތެރެ އަދި އުތުރުގެ ބައެއް އަތޮޅުތަކަށް ވިއްސާރައިގެ އަސަރުކޮށް، އެކިވަރުގެ ގެއްލުންތައް ލިބިފައިވާކަމަށެވެ.

އެހެންކަމުން، ގެއްލުންލިބޭ ރަށްތަކަށް އެހީތެރިކަން ފޯރުކޮށްދިނުމުގެ މަސައްކަތް އެ އޮތޯރިޓީން ގެންދަނީ ވިލަރެސް ކުރަމުން ކަމަށާއި އެގޮތުން، ހާލުގައިޖެހޭ ފަރާތްތަކަށް ބޭނުންވާ ވަގުތީ ބޯހިޔާވަހިކަމާ ކެއިންބުއިމުގެ އެހީތެރިކަން ފޯރުކޮށްދިމުނުމުގެ މަސައްކަތްތައް ވެސް ކައުންސިލް އިދާރާތަކާއި ގުޅިގެން ދަނީ ކުރަމުންކަމަށް ވަނީ ބުނެފައެވެ.

މި ވިއްސާރައިގައި މިއަދު އެންމެ ބޮޑު ގެއްލުމެއް ލިބިފައިވަނީ، ފާދިއްޕޮޅު ކުރެންދޫއަށެވެ. އެ ރަށުގެ 70 ވަރަކަށް ގެއަށް ފެންވަދެ އެކިވަރުގެ ގެއްލުންތައް ވެފައިވެއެވެ. އެހެންކަމުން ރަށުތެރެއިން ފެން ހިންދުމުގެ މަސައްކަތް ސިފައިންނާއި ރައްޔިތުން ގުޅިގެން ކުރަމުން ދާއިރު، ކައްކައި ކައިބޮއި ނިދައިހެދުމަށް ދަތިވާ ގެތަކަށް އެހީތެރިވުމުގެ މަސައްކަތް އެންޑީއެމްއޭ އިން ދަނީ ކައުންސިލާއި ގުޅިގެން ކުރަމުންނެވެ.



‏މާލެއަށް ވެސް ބޯކޮށް ވާރޭވެހި ފެންބޮޑުވުމާއި ގުޅިގެން އެމްއެންޑީއެފް އެހީތެރިކަމާއެކު މިއަދު ވަނީ ފެން ހިންދުމުގެ މަސައްކަތް ކުރިއަށް ގެންގޮސްފައެވެ. އަދި އާންމުކޮށް ފެންބޮޑުވެ ގެއްލުން ލިބޭ ކަމަށް ފާހަގަކުރެވޭ ގެތަކުގައި، ސިޓީ ކައުންސިލުންވަނީ ވެލިބަސްތާ ޖެހުމުގެ މަސައްކަތް ވެސް ކޮށްފައެވެ.