އޭޑީބީން ފައިސާ ހޯދައިގެން ކުރީގެ ސަރުކާރުން ހިންގި މަޝްރޫއު ފެއިލްވެ އެންމެ ފަހުން ނެތިގެން ގޮސްފައިވާ ކަމަށް ސްޓެލްކޯގެ މެނޭޖިން ޑިރެކްޓަރު ހުސެއިން ފަހުމީ ވިދާޅުވެއްޖެއެވެ.

މި މައްސަލައިގައި ފަހުވީ ވާހަކަ ދައްކަވާފައި މިވަނީ ފެލިދެއަތޮޅު ރަކީދޫގައި ގާއިމްކުރި ސޯލާ ޕްރޮޖެކްޓާ ގުޅިގެން މީސް މީޑިއާ މެދުވެރިކޮށް އެއީ، ކުރީ ސަރުކާރުގެ އޭޑީބީ ޕްރޮޖެކްޓެއް ކަމަށް ބުނެ ފާޑުކިޔުން އަމާޒުވުމުންނެވެ.

އެމްޑީ ފަހުމީ ވިދާޅުވީ ސޯލާ ފޮޓޯވޮލްޓިކް ސިސްޓަމްތަކާއި ބެޓެރީ އެނަރޖީ ސްޓޯރޭޖް ހިމެނޭ ގޮތަށް މިހާރު ކުރިއަށްދާ އިއާދަކުރަނިވި ހަކަތަ މަޝްރޫއަކީ ސްޓެލްކޯއިން ފުރިހަމައަށް ފައިސާ ހޯދައިގެން ކުރިއަށް ގެންދާ މުޅިން އައު މަޝްރޫއެއް ކަމަށެވެ.

"މިހާރު މިއޮތް އިސްނެގުމަކީ ދެމެހެއްޓެނިވި ގޮތެއްގައި ކުރިއަށް ގެންދިއުމާއި ހަކަތައިގެ މިނިވަންކަމަށް ސާބިތުކަމާއެކު ވައުދުވެފައިވާކަން ދައްކުވައިދޭ އާ، މިނިވަން މަސައްކަތެއް" އެމްޑީ ފަހުމީ ވިދާޅުވިއެވެ.

ފަހުމީ ވަނީ ކުރީގެ ވެރިކަމުގައި އޭޑީބީން ފައިސާ ދީގެން ހިންގި މަޝްރޫއުގެ ހާލަތު ދެނެގަނެ އާ ލީޑަރޝިޕްގެ ދަށުން ލިބިފައިވާ ކުރިއެރުންތަކުގެ ކޮންޓެކްސްޓާއި ވިސްނުން އިތުރުވެގެންދާނެ ކަމަށް ވިދާޅުވެފައެވެ. އަދި ފަހުމީ ވަނީ ފާޑުކީ ފަރާތަށް މި މަޝްރޫއު ކުރިޔަށް ގެންގޮސްފައިވާ ރަކީދުއަށް ޒިޔާރާތްކޮށް އެކަން ބަލާލުމަށް ދައުވަތު ދެއްވާފައެވެ.

ސްޓެލްކޯއިން މިހާރު ވަނީ މުޅި ރަކީދުއަށް 22 ގަޑިއިރަށް އިޔާދަކުރަނިވި ހަކަތަ ލިބޭނެހެން ހައިބްރިޑް ޕީވީ ބެސް ޑީޖީ ސިސްޓަމެއް ގާއިމްކޮށްފައެވެ. އަދި އިތުރު ފަސް ރަށެއްގައި އެނިޒާމް ގާއިމްކުރުމަށް ވިސްނާކަމަށްވެސް ސްޓެލްކޯއިން ބުނެއެވެ.