އެންޓި ކޮރަޕްޝަން ކޮމިޝަނުގެ ގާނޫނަށް 3 ވަނަ އިސްލާހުގެނައުމުގެ ބިލާއި އިލެކްޝަންސް ކޮމިޝަންގެ ގާނޫނަށް އިސްލާހު ގެނައުމުގެ ބިލް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތަސްދީގު ކުރައްވައިފިއެވެ.

މި ދެ ބިލަކީ 2024 ނޮވެންބަރު 25 ވީ ހޯމަ ދުވަހު ބޭއްވެވި 20 ވަނަ ރައްޔިތުންގެ މަޖިލީހުގެ 53 ވަނަ ޖަލްސާއިން ފާސްކޮށްފައިވާ ދެ ބިލެވެ.

ދެ ގާނޫނަށް ވެސް ގެނައި އިސްލާހުގައިވާ ގޮތުން، ކޮމިޝަނުގެ ރައީސާއި ނައިބުރައީސް އައްޔަންކުރާ އުސޫލަށް ބަދަލު ގެނެސްފައިވާއިރު ކޮމިޝަނުގެ މެންބަރުންގެ ތެރެއިން ކޮމިޝަނުގެ ރައީސަކާއި ނައިބުރައީސެއް ޢައްޔަނުކުރައްވާނީ ރައީސުލްޖުމްހޫރިއްޔާ ކަމަށް ވަނީ ބުނެފައެވެ.

އެގޮތުން، ކޮމިޝަނުގެ ރައީސަކު ނުވަތަ ނައިބުރައީސަކު އައްޔަންކުރާނީ، ކޮމިޝަނަށް އައްޔަންކުރެވޭ މެންބަރުންގެ ތެރެއިން މީހެއްގެ ނަން ނުވަތަ މީހުންގެ ނަން، ރައީސުލްޖުމްހޫރިއްޔާ ރައްޔިތުންގެ މަޖިލީހަށް ހުށަހެޅުއްވުމުން، ރައްޔިތުންގެ މަޖިލީހުގެ ޖަލްސާއެއްގައި ހާޒިރުވެ ވޯޓުގައި ބައިވެރިވި މެންބަރުންގެ އަޣުލަބިއްޔަތުން ފާސްކުރާ މީހަކު ނުވަތަ މީހުން ކަމަށް އިސްލާޙުތަކުގައި ބުނެފައިވެއެވެ.

އެހެންނަމަވެސް، އެ އިސްލާހުތަކަށް އަމަލުކުރަން ފެށުމުގެ ކުރިން ކޮމިޝަންތަކުގެ ރައީސާއި ނައިބުރައީސްގެ މަޤާމަށް އައްޔަންކޮށްފައިވާ މެންބަރުން، ގާނޫނުގައިވާ ގޮތުގެމަތިން މަގާމުގެ ދައުރު ހަމަވަންދެން ތިބޭނެކަމަށް އިސްލާހުގައި ބުނެފައިވެއެވެ.

މި އިސްލާހަކީ އިދިކޮޅު ފަރާތްތަކުގެ ބޮޑެތި ފާޑުކިޔުންތަކެއް އަމާޒުވި އިސްލާހެކެވެ. ނަމަވެސް، ސަރުކާރުން ބުނެފައިވަނީ އެ އިސްލާހުތަކަކީ އޭސީސީއާއި އީސީ ފަދަ ކޮމިޝަންތަކުން ވެސް އެދިގެން ގެނައި އިސްލާހެއްކަމަށެވެ.