ޕްރޮގްރެސިވް ޕާޓީ އޮފް މޯލްޑިވްސް، ޕީޕީއެމް އުވާލަން ނިންމިއަސް އެ ޕާޓީގެ މެންބަރުން ތިބޭނީ ޕީއެންސީއާއިއެކު އެއް ފިކުރެއްގައިކަމަށް ޕީޕީއެމްގެ ނާއިބު ރައީސް، މި ސަރުކާރުގެ ފިޝަރީޒް މިނިސްޓަރު އަޙްމަދު ޝިޔާމް ވިދާޅުވެއްޖެއެވެ.

ޕީޕީއެމްގެ ސެނެޓުގެ ބައްދަލުވުމެއް ބާއްވާ ޕީޕީއެމް އުވާލަން މިއަދު ވަނީ ނިންމާފައެވެ.

އެ ބައްދަލުވުމަށްފަހު ބައެއް ނޫސްތަކަށް މައުލޫމާތު ދެއްވަމުން ޝިޔާމް ވިދާޅުވީ، ޕީޕީއެމްއާއި ޕީއެންސީއަކީ އެއް ފުރާޅެއްގެ ދަށުގައި ހިނގަމުންއައި އެއް ފިކުރެއްގެ ދެ ޕާޓީކަމަށެވެ.

އަދި ޕީއެންސީއަކީ އޭރު ސިޔާސީ މަޝްރަހު އޮތްގޮތުން، ޕީޕީއެމްއަށް ވެރިކަމަށް އައުމަށް ދަތިތަކެއް ކުރިމަތިވެދާނެކަމަށް ބަލައި އުފެއްދި ޕާޓީއެއްކަމަށް ވިދާޅުވިއެވެ.

އޭގެ ސަބަބުން ދިވެހި ރައްޔިތުން ބޭނުންވިގޮތަށް މިއަދު އެ ފިކުރުގެ ވެރިކަމެއް އުފެދުމަށް މަގުފަހިވެގެން ދިޔަކަމަށް ޝިޔާމް ވިދާޅުވިއެވެ.

ޝިޔާމް ވިދާޅުވީ، ޕީއެންސީގެ ފިކުރަކީ އިސްލާމް ދީން ހިމާޔަތްކޮށް ގައުމިއްޔަތު ދެމެހެއްޓުމަަށް އިސްކަންދޭ ފިކުރެއް ކަމަށެެވެ. އަދި ދެ ޕާޓީގައި ވެސް އޮތީ މި ފިކުރު ކަމަށްވާއިރު މިއަދު ކުރެވިގެން އެ ދިޔައީ ފިކުރު ‘އެލައިން’ ކުރުމުގެ މަސައްކަތެއްކަމަށް ވިދާޅުވިއެވެ.

ޕީޕީއެމަކީ ދިވެހިރައްޔިތުންގެ ޕާޓީ ޑީއާރުޕީގެ ތެރޭގައި އުފެދުނު ހިޔާލުތަފާތުވުންތަކުގެ ތެރެއިން، ކުރީގެ ރައީސް މައުމޫން އަބްދުއްޤައްޔޫމާއި އެމަނިކުފާނުގެ ސަޕޯޓަރުން ޑީއާރުޕީން ވަކިވެގެން އުފެއްދި ޕާޓީއެވެ.

ޕީޕީއެމް މިއަދު އުވާލާފައިވާއިރު އެ ޕާޓީ އުވާލަން ޕާޓީގެ ވެރިން ނިންމާފައިވާކަމަށް ވިދާޅުވެ އެކަން ކުރީގެ ރައީސް ޔާމީން އަބްދުލްޤައްޔޫމް ދިޔައީ ކުށްވެރިކުރަމުންނެވެ.