މި އަހަރު އެކަނިވެސް އަލަށް 100 ގެސްޓްހައުސް ހުޅުވައި ހިދުމަތް ދޭން ފަށާފައިވާ ކަމަށް ފަތުރުވެރިކަމާ ބެހޭ ވުޒާރާއިން ބުނެފިއެވެ.

ފަތުރުވެރިކަމާ ބެހޭ ވުޒާރާއިން ބުނީ ރާއްޖޭގައި އަލަށް ހުޅުވި ގެސްޓްހައުސްތަކާއެކު ގެސްޓްހައުސްތަކުން ނެރުނު އެނދުގެ އަދަދު 1،000 އަށް އަރާ ކަމަށެވެ.

ވުޒާރާގެ ތަފާސްހިސާބުތައް ދައްކާ ގޮތުން މި އަހަރު ފެށުނު އިރު، ގެސްޓްހައުސްތަކުގެ ބެޑް ކެޕޭސިޓީ އުޅުނީ 13،657 ގަ އެވެ. އެއީ 809 ގެސްޓްހައުސްއާ އެކީގަ އެވެ. ނަމަވެސް އަލަށް ހުޅުވި ގެސްޓްހައުސްތަކާ އެކީ މިހާރު ގެސްޓްހައުސްތަކުގެ އަދަދު 909 އަށް އަރާފައިވާ އިރު، މިހާރުގެ ބެޑް ކެޕޭސިޓީ އަކީ 15،325 އެވެ.

ފަތުރުވެރިކަމުގެ ވިޔަފާރީގެ ތެރެއިން ގެސްޓްހައުސް ވިޔަފާރި އަކީ ރާއްޖޭގައި އެންމެ ބޮޑަށް ފުޅާވަމުން އަންނަ ވިޔަފާރި އެވެ. އެގޮތުން ލޯކަލް ޓޫރިޒަމް އެއް ދުވަހުން އަނެއް ދުވަހަށް ކުރިއަރަމުން އަންނަކަން ފާހަގަކުރެވެއެވެ.

މި އަހަރު އަލަށް ހުޅުވި 100 ގެސްޓްހައުސްއާ އެކީ ބެޑް ކެެޕޭސިޓީ އަށް ޖުމްލަ 1،214 އެނދު އިތުރުވެފައިވެ އެވެ.

މި އަހަރު މުޅި ރާއްޖޭގެ ޓޫރިޒަމްގެ ބެޑް ކެޕޭސިޓީ އަކީ 62،864 އެވެ. އެއީ 171 ރިސޯޓަކުން 42،539 އެނދާއި 909 ގެސްޓުހައުސް އިން 15،325 އެނދާއި 155 ސަފާރީއަކުން 3،044 އެނދުގެ އިތުރުން 41 ހޮޓަލަކުން 1،956 އެނދެވެ.

މި އަހަރުގެ މިހާތަނަށް ރާއްޖެ އަށް 1.8 މިލިއަން ފަތުރުވެރިން ވަނީ ޒިޔާރަތްކޮށްފައެވެ. އަދި ފަތުރުވެރިކަމާ ބެހޭ އިދާރާއިން ލަދާކުރަނީ މި އަހަރު ނިމުމުގެ ކުރިން ރާއްޖެއަށް ދެ މިލިއަން ފަތުރުވެރިން އަންނާނެ ކަމަށެވެ.