ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެފައިވާ ގޮތަށް 228 ސިޔާސީ މުވައްޒަފުން ވަޒީފާއިން ވަކިކޮށްފައިވާކަން ރައީސް އޮފީހުން ޔަޤީންކޮށްދީފިއެވެ.

ރައީސް އޮފީހުން މިކަން ޔަޤީންކޮށްދީފައިވަނީ މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން ސަރުކާރުގެ ސިޔާސީ ވަޒީފާތަކުން ވަކިކޮށްފައިވާ ފަރާތްތަކުގެ އަދަދާއި އެ ފަރާތްތައް މަސައްކަތްކުރި ވުޒާރާތަކުގެ ތަފުސީލު ހޯދުމަށް އަމިއްލަ ފަރާތަކުން ހުށައެޅުމުން ދިން ޖަވާބުގައެވެ.

އެގޮތުން ރައީސް އޮފީހުން ދީފައިވާ ޖަވާބުގައި ބުނެފައިވަނީ ސަރުކާރުން އަޅަން ނިންމި ހަރަދު ކުޑަކުރުމުގެ ފިޔަވަޅުތަކުގެ ތެރެއިން 31 އޮކްޓޯބަރ 2024ގެ ނިޔަލަށް ސިޔާސީ ވަޒީފާތަކުން 228 މީހަކު ވަކިކޮށްފައިވާ ކަމަށެވެ.

ނަމަވެސް ވަކިކުރި މުވައްޒަފުންގެ ނަމާއި މަސައްކަތްކުރި ވުޒާރާތަކުގެ މައުލޫމާތު ހާމަކޮށްފިނަމަ މުވައްޒަފުންގެ ޒާތީ މައުލޫމާތު ހާމަވެދާނެކަމަށް ގަބޫލުކުރެވޭ ކަމަށް ރައީސް އޮފީހުން ބުނެފައިވެއެވެ.

އެހެންކަމުން އެމީހުންގެ ނަންތަކާއި އެމީހުން މަސައްކަތްކުރި ވުޒާރާތަކުގެ މައުލޫމާތަކީ މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން ދޫނުކުރެވޭނެ މައުލޫމާތެއް ކަމަށް ނުދެކޭ ކަމަށްވެސް ރައީސް އޮފީހުން ވަނީ ބުނެފައެވެ.

އޭގެއިތުރުން ވަކިކުރި މުވައްޒަފުންގެ މަގާމުތަކާއި އަދަދުތައް ރައީސުލްޖުމްހޫރިއްޔާ އެކްސްގައި ހިއްސާކުރެއްވި ޕޯސްޓުގައި ތަފުސީލުކޮށް އާންމުކުރެއްވިކަން ރައީސް އޮފީހުން ފާހަގަ ކޮށްފައިވެއެވެ.

އެގޮތުން ރައީސް ޑރ. މުޢިއްޒު މީގެކުރިން ވިދާޅުވެފައިވަނީ ހަތް ސްޓޭޓް މިނިސްޓަރުންނާއި 43 ޑެޕިއުޓީ މިނިސްޓަރުންނާއި 103 ސީނިއާ ޕޮލިޓިކަލް ޑިރެކްޓަރުން މަގާމުން ވަކިކުރަން ވަނީ ނިންމާފަ އެވެ. އަދި 69 ޕޮލިޓިކަލް ޑައިރެކްޓަރުން މަގާމުން ވަކިކުރާނެ ކަމަށްވެސް ރައީސް އެދުވަހު ވިދާޅުވެފައިވެއެވެ.