މާލެ ވޯޓާ އެންޑް ސްވެރެޖް ކޮމްޕެނީން 400 މިލިއަން ރުފިޔާގެ ބޮންޑެއް ވިއްކުމަށް ހުޅުވާލައިފިއެވެ.

މި ބޮންޑާ ގުޅޭގޮތުން ރާއްޖޭގެ ކުންފުންޏެއް ކަމަށްވާ ފަސްޓް ނޭޝަނަލް ފައިނޭންސް ކޯޕަރޭޝަނުން ބުނީ، މި ބޮންޑު ވިއްކުމުގެ މަޤްސަދަކީ އެމްޑަބްލިއުއެސްސީން ހިންގާ މަޝްރޫއުތަކާ ވިޔަފާރިތަކަށް ފައިނޭންސް ހޯދުމަށް ކަމަށެވެ.

އެގޮތުން ފަސްޓް ނޭޝަނަލުން ބުނެފައިވަނީ، މި ބޮންޑް ވިއްކައިގެން ލިބޭ ފައިސާއިން، ފެނާއި ނަރުދަމާގެ ޚިދުމަތަށް ބޭނުންވާ އިންވެސްޓުމަންޓުތަކާއި މިހާރު އަތޮޅުތަކުގައި ކުރިއަށް ގެންދާ ނަރުދަމާގެ މަޝްރޫއުތައް އަވަސްކުރުމުގެ އިތުރުން، ކުންފުނިން އުފައްދާ ބައެއް ސާމާނުގެ ވިޔަފާރި ފުޅާ ކުރުން ހިމެނޭ ކަމަށެވެ.

މި ބޮންޑު ވިއްކާނީ ދެ މަރުހަލާއަކަށް ބަހާލައިގެންނެވެ. އެގޮތުން އެމްޑަބްލިއުއެސްސީގެ ވިޔަނި ޕޯޓަލް މެދުވެރިކޮށް ދުއިސައްތަ މިލިއަން ރުފިޔާގެ ބޮންޑަކަށް އިންވެސްޓުކުރުމަށް މިހާރު ވަނީ ހުޅުވާލާފައެވެ.

އަދި މި ބޮންޑަށް އިންވެސްޓުކުރާ ފަރާތްތަކަށް ފަސް އަހަރު ތެރޭގައި އަހަރަކު 7.5 އިންސައްތައިގަ އިންޓްރެސްޓް ލިބޭނެ ކަމަށް ފަސްޓް ނޭޝަނަލުން ބުނެފައިވެއެވެ.

އެމް.ޑަބްލިއު.އެސް.ސީއަކީ ދިވެހި ސަރުކާރުގެ 80 އިންސައްތަ ހިއްސާ އަދި ޖަޕާނުގެ ހިޓާޗީ ކުންފުނީގެ 20 އިންސައްތަ ހިއްސާވާ ކުންފުންޏެކެވެ. އެމް.ޑަބްލިއު.އެސް.ސީ ވުޖޫދަށް އައިސްފައިވަނީ 1995 ވަނަ އަހަރުގައެވެ.