ސީރިއާގެ ހަމަނުޖެހުންތަކުގައި އެމެރިކާ ބައިވެރި ނުވާނެ ކަމަށް އެމެރިކާގެ އިންތިޚާބީ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.

މީސްމީޑިޔާގައި ކުރެއްވި ޕޯސްޓެއްގައި ޓްރަމްޕް ވިދާޅުވީ އޭނާގެ ވެރިކަމުގައި ސީރިއާގެ ދިގު ދެމިގެންދާ ދާޚިލީ ހަނގުރާމައިގައި އެމެރިކާއިން އެއްވެސް ގޮތަކަށް ބައިވެރިނުވާނެ ކަމަށެވެ. އަދި ޓްރަމްޕް ވަނީ ސީރިޔާގައި ކުރުދީންގެ އިސްވެރިންގެ ބާރުތަކަށް ތާއީދުކުރުން ނިމުމަކަށް އަތުވެދާނެ ކަމުގެ އިޝާރާތެއް ކުރައްވާފަ އެވެ.

"ސީރިއާ އަކީ ގޯސް ތަނެއް ނަމަވެސް އަހަރެމެންގެ ރަހުމަތްތެރިއެއް ނޫން،" ޓްރަމްޕް ވިދާޅުވިއެވެ.

ސީރިއާގެ ރައީސް ބައްޝާރުލް އަސަދުގެ ސަރުކާރާ އެމެރިކާއިން ރަސްމީ ޑިޕްލޮމެޓިކް ގުޅުމެއް ނުބާއްވަ އެވެ. ނަމަވެސް އައިއެސް ބަލިކުރުމުގައި އެކުވެރިއެއްގެ ގޮތުގައި ކުރުދީންގެ އިސް ކޯލިޝަނެއް ކަމަށްވާ ސީރިއަން ޑިމޮކްރެޓިކް ފޯސަސް (އެސްޑީއެފް) އަށް އެމެރިކާއިން ތާއީދު ކުރެ އެވެ.

ޓްރަމްޕުގެ ވިސްނުންފުޅާ ހިލާފަށް އެމެރިކާގެ މިހާރު ރައީސް ޖޯ ބައިޑެންގެ ސަރުކާރުން ސީރިއަން ޑިމޮކްރެޓިކް ފޯސަސް (އެސްޑީއެފް) އަށް ތާއީދުކުރާކަން ފާހަގަ ކުރެވެއެވެ. އެގޮތުން ސީރިޔާގެ ރައީސް ގައުމު ދޫކުރަށްވައި ފިއްލެވުމުން އެމެރިކާއިން ވަގުތުން ވަނީ ސީރިޔާއަށް ވައިގެ ހަމަލާދޭން ފަށާފައެވެ. އެމެރިކާއިން ބުނީ އެ ހަމަލާތަކަކީ ސީރިޔާގައި ހަރަކާތްތެރިވާ އައިއެސްއައިއެސް އަށް އަމާޒުކޮށް ދިން ހަމަލާތަކެއް ކަމަށެވެ.

އެމެރިކާއިން ސީރިޔާއަށް އެންމެ ފަހުން ދިން ވައިގެ ހަމަލާތަކުގެ ތަފްސީލެއް އަދި އެއްވެސް ތަނަކުން ހާމަނުކުރާކަން ފާހަގަ ކުރެވެއެވެ.