ވައިގެ މަގުން ރާއްޖެ އެތެރެކުރަން އުޅުނު 235 ގުރާމުގެ މަސްތުވާތަކެތި ކަސްޓަމުން އަތުލައިގެންފިއެވެ.

ކަސްޓަމުން ނެރުނު ބަޔާނެއްގައި ބުނެފައިވަނީ މި ޑިސެމްބަރު މަހުގެ 13 ވަނަ ދުވަހު އިންޑިއާއިން ރާއްޖެ އައި 31 އަހަރުގެ ފިރިހެނެއްގެ ލަގެޖުގައި މަސްތުވާތަކެތި ރައްކާކޮށްގެން ގެނެސްފައިވާ ކަމަށް ޝައްކު ކުރެވިގެން އެމީހާ ބަލާ ފާސްކޮށްފައިވާ ކަމަށެވެ.

އަދި އެމީހާ ފާސްކުރުމުގެ ތެރޭގައި އެ މީހާގެ ލަގެޖުން މަސްތުވާތަކެތި ކަމަށް ޝައްކު ކުރެވޭ ތަކެތި ފެނުމުން އެތަކެތި ފުރަތަމަ މަރުހަލާގައި ކަސްޓަމުން ތަހުލީލު ކުރިކަމަށާއި، އެތަކެތި މަސްތުވާތަކެގީގެ ބާވަތެއް ކަމަށްވާ ކެނަބިސް އަށް ޕޮޒިޓިވް ވެފައިވާ ކަމަށް ކަސްޓަމުން ވަނީ ބުނެފައެވެ.

ކަސްޓަމުން ބުނީ އެތަކެތީގެ ބަރުދަނުގައި ޕެކިން އާއެކު ޖުމުލަ 235 ގުރާމު ހުރި ކަމަށެވެ. އަދި މިތަކެތީގެ މަގުމަތީގެ އަގަކީ 100،000.00 ދިވެހި ރުފިޔާ ކަމަށް ލަފާ ކުރެވޭ ކަމަށްވެސް ކަސްޓަމުން ވަނީ ބުނެފައެވެ.

މި މައްސަލަ އިތުރަށް ތަހުގީގު ކުރުމަށްޓަކައި މައްސަލައިގައި އަތުލައިގަނެވުނު މަސްތުވާ ތަކެއްޗާއި، އިންޑިއާ ފިރިހެން މީހާ މިހާރު ފުލުހުންނާ ހަވާލު ކޮށްފައިވާ ކަމަށްވެސް ކަސްޓަމުން ވަނީ ބުނެފައެވެ.