އެމެރިކާގައި ގެދޮރު ނެތި އުޅޭ މީހުންގެ އަދަދު މިދިޔަ އަހަރު 18 އިންސައްތައަށް އިތުރުވެފައިވާ ކަމަށް ޑިޕާޓްމަންޓް އޮފް ހައުސިން އެންޑް އާބަން ޑިވެލޮޕްމަންޓް (އެޗްޔޫޑީ) އިން ނެރުނު އާ ރިޕޯޓެއްގައި ބުނެފިއެވެ.

ހުކުރު ދުވަހު އާންމުކުރި ތަފާސް ހިސާބުތަކުން ދައްކާ ގޮތުގައި މުޅި ޔޫއެސްގައި 771،000 އަށް ވުރެ ގިނަ މީހުންނަކީ ގެދޮރު ނެތުމުގެ ސަބަބުން މަގުމަތީގައި އުޅެން ޖެހިފައިވާ މީހުންކަން ވަނީ ފާހަގަ ކުރެވިފައެވެ.

އެޗްޔޫޑީން ބުނި ގޮތުގައި މިއީ މިހާތަނަށް ރެކޯޑްކުރެވުނު އެންމެ މަތީ އަދަދު ކަމަށް ވާއިރު ގެދޮރު ނެތް މީހުންގެ ތެރެއިން ބައެއް މީހުން މިހާރު ދިރިއުޅެނީ ވަގުތީ ބޯހިޔާވަހިކަމުގަ އާއި ޓްރާންސިޝަނަލް ހައުސިންތަކުގައެވެ.

މި ހޯދުންތަކުގައި ފާހަގަވި މީހުންގެ ތެރޭގައި އަމިއްލަ ބޯހިޔާވަހިކަމެއް ނެތުމުން ރައްޓެއްސަކާ ނުވަތަ އާއިލާގެ މެމްބަރަކާ އެކު އުޅޭ މީހުން ނުހިމެނެއެވެ. އަދި އެފަދަ ފަރާތްތައް ހިމަނައިފިނަމަ މި އަދަދު ވަރަށް ބޮޑަށް އިތުރުވާނެއެވެ.

ޕީޑީއެފްގެ ރިޕޯޓުގައި ބުނެފައިވާގޮތުން އެމެރިކާ ގައި ގިނަ ބަޔަކު ވަންނާނެ ބޯހިޔަލެއް ނެތި މަގުމަތިވުމަށް މެދުވެރިވެފައިވާ މައިގަނޑު މައްސަލަތަކުގެ ތެރޭގައި އަތްފޯރާފަށުގައި ބޯހިޔާވަހިކަން ނެތުމާއި، އިންފްލޭޝަން މަތިވުމާއި، ނަސްލީ ތަފާތުކުރުމުގެ އަސަރުތައް އޮންނާތީ ކަމަށް ފާހަގަ ކޮށްފައި ވެއެވެ.

އެމެރިކާގައި ގެދޮރު ނެތް މީހުންގެ އަދަދު އިތުރުވަމުން އަންނަތާ އަހަރުތަކެއް ވެފައިވާއިރު، އޭގެ ބޮޑު ސަބަބަކީ އެގައުމުގެ ކުރިއަރަމުންދާ ސިޓީތަކުގައި އަގުހެޔޮ ބޯހިޔާވަހިކަމުގެ ގޮތްތައް ނެތުމެވެ. މިދިޔަ އަހަރު އާންމުކުރި ތަފާސް ހިސާބުތަކުން ދައްކާ ގޮތުގައި 2023 ވަނަ އަހަރު ގެދޮރު ނެތް މީހުންގެ އަދަދު ވަނީ އޭގެ ކުރީ އަހަރާ އަޅާބަލާއިރު 12 އިންސައްތަ އިތުރުވެފަ އެވެ.