ރާއްޖޭގެ އެކިރަށްރަށުގައި އެމްޑަބްލިއުއެސްސީން ކުރިއަށް ގެންދާ ފެނާއި ނަރުދަމާ ނިޒާމުގެ ގާއިމްކުރުމުގެ މަޝްރޫއުތަކުގެ ތެރެއިން 20 ރަށެއްގައި މަސައްކަތް ނިންމި ކަމަށް އެ ކުންފުނިން ބުނެފިއެވެ.

އެގޮތުން ފަސް ރަށެއްގެ ފެނުގެ ނިޒާމު ގާއިމުކުރުމާއި އަދި 15 ރަށުގެ ފެނާއި ނަރުދަމާ ނިޒާމު ގާއިމުކޮށް ނިންމި ކަމަށް އެ ކުންފުނިން ބުނެފައި ވެއެވެ.

އެމްޑަބްލިއުއެސްސީން ފެނުގެ ނިޒާމް ގާއިމުކޮށް ނިންމި ރަށްތަކުގެ ތެރޭގައި ހއ.މުރައިދޫ، ށ.ފީވައް، ނ.ހެނބަދޫ، ރ.އިންނަމާދޫ، އ.އ.މަތިވެރި ހިމެނެއެވެ. އަދި ފެނާއި ނަރުދަމާ ނިޒާމު ގާއިމްކޮށްފައިވާ ރަށްތަކަކީ، ހއ.ވަށަފަރު، ހއ.މާރަންދޫ، ހއ.ތަކަންދޫ، ހދ.ހިރިމަރަދޫ، ހދ.ކުމުންދޫ، ށ.ގޮއިދޫ، ނ.މާފަރު، ނ.ފޮއްދޫ، ރ.ފައިނު، ބ.ކަމަދޫ، ބ.މާޅޮސް، ޅ.އޮޅުވެލިފުށި، އދ. ކުނބުރުދޫ، އއ.ހިމަންދޫ، އއ.ފެރިދޫއެވެ.

އެމްޑަބްލިއުއެސްސީން ބުނީ އެ މަޝްރޫއުގެ ދަށުން ރަށްރަށުގައި ފެސިލިޓީ ބިލްޑިންގ އިމާރާތްކޮށް، ފެން އުފެއްދުމަށް ބޭނުންވާ ފެން ޕްލާންޓާއި އެހެނިހެން ވަސީލަތްތައް ގާއިމްކޮށް، ފެން ރައްކާކުރުމަށް ތާނގީ ބަހައްޓައި، ފެނާއި ނަރުދަމާ ހޮޅީގެ މައިނެޓްވޯރކް އަޅައި އަދި ގޭގެއަށް ފެނާއި ނަރުދަމާ ކަނެކްޝަން ގުޅައިދީފައިވާ ކަމަށެވެ.

އަދި އޭގެ އިތުރުން، ނަރުދަމާގެ ޕަންޕިންގ ސްޓޭޝަންތައް ގާއިމުކޮށް ސީ އައުޓް ފޯލް އާއި ރިޖެކްޓް ލައިންވެސް އެޅިކަމަށް އެ ކުންފުނިން ބުނެފައި ވެއެވެ. ހަމަ އެހެންމެ ފެން ތަހުލީލުކުރުމަށް ބޭނުންވާ ސާމާނު އެ މަޝްރޫއުގެ ދަށުން ފޯރުކޮށްދެވިގެންދާނެ ކަމަށް އެމްޑަބްލިއުއެސްސީން ބުނެފައި ވެއެވެ.

ކުރީގެ ހައުސިން، ޕްލޭނިން އަދި އިންފްރާސްޓްރަކްޗާ މިނިސްޓްރީން އެމްޑަބްލިއުއެސްސީއާ ހަވާލުކޮށްގެން ކުރިއަށް ގެންދިޔަ އެ 20 ރަށުގެ މަޝްރޫއުގެ އަގަކީ 1.34 ބިލިއަން ރުފިޔާއެވެ.