މިއަދުވެސް ރާއްޖޭގެ ބައެއް ރައްތަކަށް ބޯކޮށް ވާރޭވެހި ގުގުރުން އެކަށީގެންވާ ކަމަށް މޯލްޑިވްސް މީޓިިއޮރޮލޮޖިކަލް ސެންޓަރު، މެޓުން ހާމަ ކޮށްފިއެވެ.

މެޓުން ބުނީ އުތުރާއި، މެދުރާއްޖެތެރޭގެ އެކި ހިސާބު ތަކަށް ވިއްސާރަ ކުރާނެ ކަމަށާއި، ބައެއް ރައްތަކަށް ބޯކޮށް ވާރޭވެހި ގުގުރުން އެކަށީގެންވާ ކަމަށެވެ. އަދި ދެކުނުގެ ބައެއް ރަށްތަކަށް ކެރީގެ އަސަރު ކުރިނަމަވެސް އާންމު ގޮތެއްގައި މޫސުން ރަނގަޅުވާނެ ކަމަށް ލަފާކުރެވޭ ކަމަށް މެޓުން ވަނީ ބުނެފައެވެ.

އެ އިދާރާއިން ބުނީ ދެކުނުގެ ސަރަހައްދަށް ހުޅަނގާއި ހުޅަނގު އުތުރުން، އެހެނިހެން ހިސާބުތަކަށް އިރު އުތުރާއި، އިރުން، ގަޑިއަކު 8 މޭލާއި، 18 މޭލާއި ދެމެދު ބާރުމިނުގައި ވައިޖެހޭނެ ކަމަށް ލަފާކުރެވޭ ކަމަށެވެ. އަދި އުތުރާއި މެދު ރާއްޖެތެރޭގައި ވިލާގަނޑުގައި ގަޑިއަކު 35 މޭލަށް ވައިގަދަވުން އެކަށީގެންވާ ކަމަށްވެސް މެޓުން މައުލޫމާތު ދެއެވެ.

ރާއްޖޭގެ ކަނޑުތައް އާދައިގެ ވަރަކަށް ގަދަވާނެ ކަމަށާއި، އަދި ވިލާގަނޑުގައި ގަދަވުން އެކަށީގެންވާ ކަމަށްވެސް މެޓުން ބުނެއެވެ. ހަމައެއާއެކު ރާޅުގެ އުސްމިނުގައި ހަތަރު ފޫޓާއި ހަ ފޫޓު ހުންނާނެ ކަމަށްވެސް އެ އިދާރާއިން ލަފާކޮށްފައި ވެެއެވެ.

މިހާރު ރާއްޖެއަށް ކުރަމުންދާ ވިއްސާރައިގައި ގިނަ ރަށްތަކެއްގައި ފެންބޮޑުވެ އެކި ވަރުގެ ގެންލުންތައް ލިބެމުންދާއިރު ބައެއް ސަރަހައްދުގައި ސިފައިންވެސް ދަނީ ހަރަކާތްތެރިވަމުންނެވެ.