ދިވެހިރާއްޖޭގެ ޤައުމީ ޔުނިވަރސިޓީއާއި އިސްލާމީ ޔުނިވަރސިޓީ ގުޅިގެން ރާއްޖޭގައި ދީނާއި ގުޅޭ ޢިލްމީ ދިރާސަތަކެއް ކުރަން ނިންމައިފިއެވެ.

އިސްލާމީ ކަންތައްތަކާ ބެހޭ ވުޒާރާއިން ބުނީ މި ދިރާސާތަކަކީ ރާއްޖޭގައި ދީނީ ހަމަޖެހުން ދެމެހެއްޓުމަށްޓަކައި ކުރެވޭ ދިރާސާތަކެއް ކަމަށެވެ. މިއަހަރުގެ ތެރޭގައި ކުރިޔަށް ގެންދިއުމަށް ނިންމާފައިވާ މި ދިރާސާތަކަކީ އިސްލާމީ ކަންތައްތަކާ ބެހޭ ވުޒާރާއިން މިއަހަރު ކުރުމަށް ނިންމާފައިވާ ކަންކަން ހިމެނޭ އެކްޝަން ޕްލޭންގެ ތެރޭގައި ހިމެނޭ ކަން

ކަމެކެވެ.

ރާއްޖެގައި ދީނީ ހަމަޖެހުން ދެމެހެއްޓުމަށްޓަކައި މިއަހަރުގެ ތެރޭގައި މައިގަނޑު ހަތަރު ދިރާސާއެއް ކުރުމަށް އަމާޒު ހިފާފައިވާކަމަށް މިނިސްޓްރީން ބުނެއެވެ. އެގޮތުން ޤައުމީ މަންހަޖާއި މުގައްރަރުތަކުގައި އިސްލާމީ އަޚުލާޤުގެ ބައި ހިމެނިފައިވާ މިންވަރު ދެނަގަތުމަށްޓަކައި ދިރާސާއެއް ކުރުމަށް ވެސް ނިންމާފައިވެއެވެ.

މިނިސްޓްރީން ބުނީ މުޖުތަމަޢުގައި ގަނާކުރުމާއި ޖުވާކުޅުމާއި ވައްކަމާއި ފޭރުން، އަދި ޓެކުން، އަދި ހަށިވިއްކުން ފަދަ ނޭދެވޭ ކަންކަން ހުރި މިންވަރު ދެނެގަތުމަށްޓަކައި ދިރާސާތައް ކުރުމަށްވެސް ހަމަޖެހިފައިވާކަމަށެވެ.

ފާއިތުވި އަހަރެކޭ އެއްގޮތަށް މިއަހަރުވެސް ދީނީ ޝިއާރު ފުޅާކުރުމަށްޓަކައި މިނިސްޓްރީން ވަނީ މުހިއްމު މަސައްކަތްތަކެއް ކުރިއަށްގެންދިޔުމަށް ރާވާފައެވެ. އެގޮތުން ދުނިޔޭގެ އެކި ޢިލްމުވެރިންގެ އެހީތެރިކަމާއެކު ދަޢުވާގެ ކަންކަން ކުރިއަށް ގެންދިޔުމަށް މަގުފަހި ކުރުމަށްޓަކައި ބޭރުގެ ޤައުމުތަކާއެކު އެއްބަސްވުންތަކެއްގައި ސޮއިކުރުމަށް ވެސް ހަމަޖެހިފައިވެއެވެ.