ފާއިތުވި 2024 އަހަރު އެކަނިވެސް ރާއްޖޭގެ ފަތުރުވެރިކަމުގެ ދާއިރާ އަށް އަލަށް 1،598 އެނދު އިތުރުވި ކަމަށް ފަތުރުވެރިކަމާ ބެހޭ ވުޒާރާއިން ބުނެފިއެވެ.

ފަތުރުވެރިކަމާ ބެހޭ ވުޒާރާއިން ބުނީ އަލަށް އިތުރުވި އެނދާއެކު މިދިޔަ އަހަރު ނިމުނު އިރު ރާއްޖޭގެ ’ބެޑް ކެޕޭސިޓީ‘ 63،248 އަށް އިތުރުވި ކަމަށެވެ. އޭގެ ކުރީ އަހަރު މި އަދަދު އުޅެނީ 61،650 ގައެވެ.

ފަތުރުވެރިކަމުގެ ދާއިރާގެ އެނދުތައް އިތުރުވަމުން އަންނަނީ ގެސްޓްހައުސްތައް އިތުރުވަމުން އަންނާތީ އެތަންތަނުގެ އެނދުތައް އިތުރުވުމުންނެވެ. 2023 ވަނަ އަހަރު ގެސްޓްހައުސްތަކުން ޖުމްލަ ބެޑް ކެޕޭސިޓީ އަކީ 13،657 ގައެވެ. މިދިޔަ އަހަރު ނިމުނު އިރު އެ އަދަދު ވަނީ 15،621 އަށް އަރައިފަ އެވެ.

ބެޑްކެޕޭސިޓީ ބެހިފައިވާ ގޮތަކީ 172 ރިސޯޓަކުން 42،547 އެނދު،
929 ގެސްޓުހައުސްއަކުން 15،621 އެނދު،
155 ސަފާރީއަކުން 3،052 އެނދު،
15 ހޮޓަލަކުން 2،028 އެނދެވެ.

މިހިނގާ 2025 ވަނަ އަހަރަކީވެސް ގިނަ ރިސޯޓްތަކާއި ގެސްޓްހައުސްތަކުގެ އިތުރުން ހޮޓާތަކެއް ހުޅުވާނެ އަހަރަކަށް ވާނެއެވެެ.