ސަރުކާރު ހިންގާ ޕީއެންސީން، މެމްބަރުން އިތުރުކުރުމަށް ހިންގި ހަރަކާތުގެ ތެރެއިން އިލެކްޝަންސް ކޮމިޝަނަށް ހުށަހެޅި ހުރިހާ ފޯމުތަކެއް ވަކިވަކިން ޗެކްކުރަން އެމްޑީޕީގެ ތަރުޖަމާނު އަނަސް އަބުދުލް ސައްތާރު ގޮވާލައްްވައިފިއެވެ.

އެމްޑީޕީން މިއަދު ވަނީ އޮޅުވާލައިގެން އެ ޕާޓީގެ ގައުމީ މަޖިލީހުގެ މެމްބަރުންތަކެއް ޕީއެންސީ އަށް ވައްދާފައިވާ މައްސަލައާ ގުޅިގެން އިލެކްޝަންސް ކޮމިޝަނުގެ މެމްބަރުންނާއި ބައްދަލުކޮށްފައެވެ. އަދި އެމައްސަލައިގައި ހުރި ކަންބޮޑުވުންތައް އީސީ އާއި އެމްޑީޕީން ވަނީ ހިއްސާކޮށްފަ އެވެ.

އެ ބައްދަލުވުމަށްފަހު "ރާއްޖެޓީވީ" އަށް ދެއްވި އިންޓަވިއުއެއްގައި އެމްޑީޕީގެ ތަރުޖަމާނު އަނަސް އަބަދުލް ސައްތާރު ވިދާޅުވީ ޕީއެންސީން މިހާރު ހުށަހަޅާފައި ހުރި ފޯމުތައް ޕްރޮސެސް ކުރުން ހުއްޓާލައި، އެ ހުރިހާ ފޯމުތައް އަލުން ވަކިވަކިން ޗެކްކުރަން އީސީގައި އެދިފައިވާނެ ކަމަށެވެ.

ޕީއެންސީން ހުށަހެޅި ފޯމުތައް ޗެކްކުރަން އެމްޑީޕީން ގޮވާލާފައިވާއިރު، އެ ޕާޓީގެ ގައުމީ މަޖިލީހުގެ މެމްބަރު އަދި ރައްޔިތުންގެ މަޖިލީހުގެ މަނަދޫ ދާއިރާގެ ކުރީގެ މެންބަރު މުހައްމަދު ތޯރިގު، އޮޅުވާލައިގެން ޕީއެންސީ އަށް ވެއްދި ކަމަށް ބުނާ މައްސަލަ މިއަދު ވަނީ ފުލުހަށް ވެސް ހުށަހަޅައިފަ އެވެ. މީގެ އިތުރުން އިތުރު ބަޔެއް ފަރާތްތައް ނޭނގި ޕީއެންސީ އަށް ވެއްދި ކަމަށް ބުނާ މައްސަލަތަކެއް ވެސް ވަނީ ފެންމަތިވެފައެވެ.