ސިޔާސީ ފަރާތްތަކުން ޤައުމުގެ ހަމަޖެހުން ނަގާލަން ކުރާ މަސައްކަތް ހުއްޓުވާނެ ކަމަށް ރައީސް ޑރ.މުޙައްމަދު މުޢިއްޒު މިރޭ ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، ހުވަދުއަތޮޅުގެ ބައެއް ރަށްތަކަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން، މިރޭ ގއ. މާމެންދޫ ރައްޔިތުންނާ މުޚާޠަބުކުރައްވައި ދެއްކެވި ވާހަކަފުޅުގައެވެ. މިރަސްމިއްޔާތުގައި ރައީސް ޑރ.މުޙައްމަދު މުޢިއްޒު ވިދާޅުވީ، ހަޤީޤީ މާނައިގައި ގައުމުގައި ހަމަޖެހުން އޮންނަން އެމަނިކުފާނު ބޭނުންފުޅުވާ ކަމަށެވެ. ރައީސް ވިދާޅުވީ ތަރައްޤީގެ ނަފާ ރައްޔިތުންނަށް ލިބޭނީ ޤައުމުގައި ހަމަޖެހުން ޤާއިމްވެ އޮވެގެން ކަމަށެވެ. ރައީސް ވިދާޅުވީ ގައުމަށް ގެންނަން ބޭނުން ވަނީ ވަށާޖެހޭ ތަރައްގީއެއް ކަމަށާއި އެ ތަރައްގީ ގެންނަން ބޭނުން ވަނީ ހަމަޖެހުން ގައުމުގައި އޮވެގެން ކަމަށެވެ. އަދި ސިޔާސީ ފަރާތްތަކުން އަދި އެހެން ވެސް ބަޔަކަށް ގައުމުގެ ހަމަޖެހުން ނަގާލަން ޖާގަ ނުދެއްވާނެ ކަމަށް ރައީސް ވިދާޅުވިއެވެ.

"މިޤައުމުގައި ސިޔާސީ ފަރާތްތަކުން އަދި އެނޫންވެސް ބަޔަކަށް މިހަމަޖެހުން ނަގާލުމަކަށް އަޅުގަނޑެއް ޖާގައެއް ނުދޭނަން. އެއްވެސް ފުރުސަތެއް އެކަމަކަށް ނުދޭނަން. އެކަމަށް އެއްވެސް ބަޔަކު އެއްވެސް ކަމެއް ކުރަން މަސައްކަތްކޮށްފިނަމަ އަޅުގަނޑު އެކަން ޤައުމީ ވިސްނުމެއްގައި ހުއްޓުވާ ޤައުމުގެ ހަމަޖެހުން ޔަގީންކުރާނަން," ރައީސް ވިދާޅުވިއެވެ.

މީގެ އިތުރުން ރައީސް މުއިއްޒު ވިދާޅުވީ ފާއިތުވި އަހަރު ގައުމުގައި އޮތީ ހަމަޖެހުން ގާއިމުވެފައި ކަމަށާއި ބަދަލުހިފުމުގެ އެއްވެސް ކަމެއް ނުހިނގާ ކަމަށެވެ. ސިޔާސީ ވާދަވެރިކަމުގެ ތެރެއިން މީހުންނަށް އަނިޔާކުރުމާއި، ހައްޔަރުކޮށް ޖަލަށްލުމަކީ އެމަނިކުފާނު ގަބޫލުކުރައްވާ ކަމެއް ނޫން ކަމަށް ރައީސް ވިދާޅުވިއެވެ.

"މިގައުމުގައި އަޅުގަނޑެއް އިރާދަކުރެއްވިއްޔާ ދުވަހަކުވެސް ސިޔާސީގޮތުން އެއްވެސް މީހަކަށް އަނިޔާއެއް ނުކުރާނަން، ބަދަލުހިފުމެއް ނޯއްނާނެ، އެއީ ހަމަޖެހުން ހަޤީޤީ މާނައިގައި އޮންނަން އަޅުގަނޑު ބޭނުންވާތީ،" ރައީސް ވިދާޅުވިއެވެ.

ރައީސް ވަނީ ގައުމުގައި ހަމަޖެހުން ގާއިމްކުރުމަށް ކުރާ މަސައްކަތަށް ރައްޔިތުން އެއްބާރުލުން ދެއްވުމަށް އެދިވަޑައިގެންފައެވެ.