ފަހި ދިރިއުޅުން ކޯޕަރޭޝަން (އެފްޑީސީ) އިން ހުޅުމާލޭ ދެވަނަ ފިޔަވަހީގައި އިމާރާތްކުރާ 4،000 ފުލެޓު ލިބޭ މީހުންގެ ލިސްޓު ރޯދައިގެ ކުރިން އިއުލާންކުރަން މަސައްކަތްކުރަމުންދާ ކަމަށް ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސް މިހެން ވިދާޅުވީ ރައްޔިތުންނާ ބައްދަލުކުރެއްވުމަށް ކުރައްވަމުން ގެންދަވާ ދަތުރުފުޅު ތަކުގެ ތެރެއިން ހުވަދުއަތޮޅަށް ކުރެއްވި ދަތުރުފުޅު ނިންމަވާލައްވައި ދައުލަތުގެ މީޑިޔާ ޕީއެސްއެމަށް ދެއްވި ބަސްދީގަތުމެއްގައެވެ. ރައީސް ޑރ. މުޙައްމަދު މުއިއްޒު ވިދާޅުވީ، ފަހި ދިރިއުޅުން ކޯޕަރޭޝަން (އެފްޑީސީ) އިން ހުޅުމާލޭ ދެވަނަ ފިޔަވަހީގައި އިމާރާތްކުރާ 4،000 ފުލެޓުގެ ލިބޭ މީހުންގެ ލިސްޓު ރިވިއުކުރުމުގެ މަސައްކަތް މިހާރު ވެސް ކުރަމުންދާކަމަށެވެ.

އެގޮތުން ލިސްޓު ރިވިއުކުރުމުގެ މަސައްކަތް ނިންމައި ރޯދައިގެ ކުރިން ފައިނަލް ލިސްޓް އިއުލާންކުރަން މަސައްކަތް ކުރަމުންދާކަމަށް ރައީސް މުއިއްޒު ވިދާޅުވިއެވެ. ރައީސް ވިދާޅުވީ އެެެއްވެސް މީހަކަށް ދީފައިވާ ގޯއްޗެއް ފުލެޓެއް މިސަރުކާރުން އަތުނުލާނެ ކަމަށެވެ. އެހެން ނަމަވެސް ނުގަވާއިދުން މަކަރާއި ދޮގު ހަދައި ފޯޖް ޑޮކިއުމަންޓެއް ހުށަޅައިގެން މީހަކަށް ގޯއްޗެއް ފުލެޓެެއް ލިބިފައިވާނަމަ އެމައްސަލަ ބަލާނެ ކަމަށް ރައީސް މުޢިއްޒު ވިދާޅުވިއެވެ. އަދި ކަނޑައެޅިފައިވާ އުސޫލާ ހިލާފަށް ފުލެޓެއް ނުވަތަ ގޯއްޗެއް މީހަކަށް ލިބިފައިވާނަމަ ކެންސަލް ކުރެވޭނެ ކަމަށް ރައީސް މުޢިއްޒު ވިދާޅުވިއެވެ.

"އެކަހަލަ ކަންތައްތަކެއް ހިންގާފައި އޮވެގެން ނޫނީ އޭސީސީން އެބެލިބެލުންތަކުގެ ތެރެއިން ގޯސްކޮށް ކަމެއް ކޮށްފައި އޮތްބަޔަކު ފިޔަވައި އެންމެންނަށް އަޅުގަނޑު ވައުދުވީ ގޮތަށް ދޭން ބޭނުންވަނީ އެހެންވީމާ ކުރިއަށް އޮތް ދުވަސްތަކުގައި ވަރަށް ބާރު ސްޕީޑްގައި ވައުދުވީ ގޮތަށް އެކަން ކުރަން މަސައްކަތް ފަށާފައި އެ އޮތީ، މައިގަނޑު އަމާޒަކީ އެމީހަކަށް ފުލެޓް ލިބުނުތާކުން ގޯތި ލިބުނު ތާކުން ވިއްޔާ ދިނުން، އެކަމަކު ގޯސްތަކެއް ހަދާފައި އޮތް ބަޔެއްގެ މައްސަލަތައް ބެލިގެންދާނެ، އަޅުގަނޑު މި އުއްމީދުކުރަނީ ވީހާވެސް އަވަހަކަށް އެ 4000 ފުލެޓްގެ ކަންކަން ނިންމައި އަޅުގަނޑުމެންނަަށް އިއުލާންކުރެވޭނެ ކަމަށް،" ރައީސް ވިދާޅުވިއެވެ.