ދެތިން ދުވަސްތެރޭ އެމެރިކާގައި ފެތުރުނު އަލިފާންގަނޑުން ލިބުނު ގެއްލުމުގެ އަގު 50 ބިލިއަން ޑޮލަރުން މައްޗަށް އަރާނެ ކަމަށް ތަޖުރިބާކާރުން ލަފާކުރަން ފަށައިފިއެވެ.

އަންގާރަ ދުވަހުންފެށިގެން އެމެރިކާގެ ކެލިފޯނިއާ ސްޓޭޓްގެ ލޮސް އެންޖެލިސްގައި ރޯވެ އަނދަމުންދާ އަލިފާނަކީ، މުޅި އެމެރިކާގެ ތާރީޚްގައިވެސް މިހާތަނަށް އެންމެ ގެއްލުންބޮޑު އަލިފާނުގެ ހާދިސާކަމަށް ގިނަ ބަޔަކު ދަނީ ބުނަމުންނެވެ.

ޖޭޕީ މޯގަން ޗޭސް ބޭންކުން ބުނެފައިވާ ގޮތުގައި، ލޮސް އެންޖެލިސް ސަރަހައްދުގައި ރޯވެ އަނދަމުންދާ އަލިފާނުގެ ސަބަބުން އިގްތިސާދީގޮތުން ލިބޭ ގެއްލުމުގެ އަގު 50 ބިލިއަން އެމެރިކާ ޑޮލަރަށްވުރެ މަތިވާނެ ކަމަށް މިހާރު އަންދާޒާ ކުރެވޭ ކަމަށެވެ.

މަހުޖަނުންނާއި މަޝްހޫރު ޝަހުސިއްޔަތުންވެސް ދިރިއުޅެމުންދާ ލޮސް އެންޖެލިސްއާއި، އެ ސިޓީ ވަށައިގެންވާ ސަރަހައްދުތަކުގައި ރޯވެ އަނދަމުންދާ ބޮޑު ތިން އަލިފާންގަނޑުގެ ސަބަބުން ގާތްގަނޑަށް 10،000 އޭކަރުގެ ބިން، މިހާތަނަށް އަނދާފައި ވެއެވެ.

މި ސަރަހައްދުތަކުން މިހާތަނަށް 2،000 އަށްވުރެ ގިނަ ގެއާއި އިމާރާތްތައް އަނދައި އަޅިއަށް ވެގެން ގޮސްފައިވާކަމަށް ރިޕޯޓްތައް ބުނެއެވެ. މި އަލިފާނުގެ ހާދިސާތަކުގައި މިހާތަނަށް މަރުވިކަން ކަށަވަރު ވެފައިވަނީ ފަސް މީހުން ކަމަށް ރިޕޯޓްތައް ލިބެއެވެ. އެހެން ނަމަވެސް، ލޮސް އެންޖެލިސް ޝެރިފްސް ޑިމާޓްމަންޓުން ބުނެފައިވަނީ، ލިބެމުންދާ ރިޕޯޓްތައް ބުނާގޮތުގައި މަރުވާ މީހުންގެ އަދަދުތައް އިތުރުވާނޭ ކަމަށެވެ.

ހަލުވިކަމާއެކު ފެތުރެމުންދާ މި އަލިފާންގަނޑުގެ ސަބަބުން ލައްކައަކަށްވުރެ ގިނަ މީހުން ރައްކާތެރި ސަރަހައްދުތަކަށް ބަދަލުކޮށްފައިވާއިރު މިހާރުވެސް އެމެރިކާގެ ގާތްގަނޑަކަށް ބައި މިލިއަނެއްހާ މީހުން ތިބީ ކަރަންޓާއި ފެނުން މަހުރޫމުވެފައެވެ.

އަލިފާންގަނޑު ކޮންޓްރޯލް އެމެރިކާގެ އަލިފާން ނިއްވާ 7،500 އަށްވުރެ ގިނަ މީހުން ހަރަކާތްތެރިވަމުންދާއިރު އަވައްޓެރި ބައެއް ގައުމުތަކުންވެސް ދަނީ އަލިފާން ކޮންޓްރޯލްކުރުމުގައި އެހީވަމުންކަން ފާހަގަ ކުރެވެއެވެ.