މަގުމައްޗަށް ނިކުމެގެން ސަރުކާރު ވައްޓައިނުލެވޭނެ ކަމަށް ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުﷲ ވިދާޅުވެއްޖެއެވެ.

ދިވެހިރާއްޖޭގެ އަޑުގެ ޕްރޮގުރާމަކަށް ދެއްވި އިންޓަވިއުއެއްގައި ސަރުކާރު ހިންގާ ޕީޕަލްސް ނެޝަނަލް ކޮންގްރެސް، ޕީއެންސީގެ ޗެއަރޕާސަން އަދި މަޖިލީހުގެ ރައީސް ޢަބްދުއްރަޙީމް ޢަބްދުﷲ ވިދާޅުވީ މަގުމައްޗަށް ނިކުމެގެން ސަރުކާރު ވައްޓައިނުލެވޭނެ ކަމަށާއި އެއީ ކުރެވޭނެ ކަމެއް ނޫން ކަމަށެވެ. އަބުދުއްރަޙީމް ވިދާޅުވީ ގާނޫނީ ގޮތުން ފަސް އަހަރުގެ ދައުރަކަށް ރައްޔިތުން އިންތިހާބު ކޮށްފައިވާ ސަރުކާރެއް މަގުމަތިން ވައްޓާލަން މަސައްކަތް ކުރުމަކީ ކުރަން ހެއުވާވަރުގެ ކަމެއް ނޫން ކަމަށެވެ. އަދި ގާނޫނާއި ހިލާފަށް މަގުމަތިން ސަރުކާރު ވައްޓާލަން މަސައްކަތް ކުރުމަކީ ދިވެހި ގައުމަށް ވެވޭ ވަރަށް ބޮޑު ޚިޔާނާތެއް ކަމަށް އަބުދުއްރަޙީމް ވިދާޅުވިއެވެ.

"އަޅުގަނޑު ދަންނަވާލަން ބޭނުންވަނީ އެގޮތަށް މަގުމައްޗަށް ނިކުމެ ރައްޔިތުންނަށް އޮޅުވާލައި ރައްޔިތުންގެ ތެރޭގައި ފިތުނަ ފަސާދަ އުފައްދައި ރައްޔިތުން ބިރުވެރިކަމުގެ ތެރެއަށް ގެންގޮސް މިކަންކަން ނުކުރާށޭ، މިހާރު ރާއްޖޭގައި މި އޮތް ނިޒާމްގައި އެބައޮތޭ ފަސްއަހަރުން އެއްއަހަރު ވެރިކަން ކަމު ނުގޮސްފިއްޔާ ބަދަލުކުރުމުގެ ފުރުސަތު ރައްޔިތުންގެ އަތުގައި. އެހެންވީމާ އެ ފުރުސަތަށް އިންތިޒާރު ކުރަށްވާށޭ، ގާނޫނީ ސަރުކާރެއް ހިނގަމުންދަނިކޮށް ގާނޫނީ އިމުގެ ބޭރުން ސަރުކާރު ވައްޓާލަން މަސައްކަތްކޮށްގެން ނުވާނެ،" އަބުދުއްރަހީމް ވިދާޅުވިއެވެެ.