އެމެރިކާގެ ލޮސް އެންޖެލިސްގައި ފެތުރެމުންދާ އަލިފާންގަނޑާއި ދިމާކޮށް މި ދަނޑިވަޅުގައި ވައްކަންކުރާ ކުރާ ފަރާތްތައް އިތުރުވެ ވަގުންގެ އުނދަގޫ އިންތިހާއަށް ދިއުމުން ބައެއް ސަރަހައްދުތަކުގައި ކާފިއު އިއުލާންކޮށްފިއެވެ.

މީޑިޔާ ރިޕޯޓްތައް ބުނާ ގޮތުގައި ލޮސް އެންޖެލިސްގައި ހަލުވިކަމާއެކު ފެތުރެމުންދާ ބޮޑު އަލިފާންގަނޑުގެ ސަބަބުން އެތައް ހާސް ބަޔަކު އެމީހުންގެ ގެތައް ދޫކޮށް ރައްކާތެރި ހިސާބުތަކަށް ވަނީ ބަދަލުވެފައެވެ. އަދި ބައެއް ފަރާތްތަކުން ބަދަލުވާން މިހާރުވެސް އަންގަމުންދާއިރު ވަގުން ދަނީ މި ދަނޑިވަޅުގެ ބޭނުން ނަހަމަގޮތުގައި ހިފައި ގެތަކުން ވައްކަން ކުރަން ފަށާފައެވެ.

ސީއެންއެން އިން ރިޕޯޓުކޮށްފައިވާ ގޮތުގައި، ބައެއް ސަރަހައްދުތަކަށް ވަނީ އިރުއޮއްސި 6:00 އިން ހެނދުނު 6:00 އަށް ކާފިއު އިއުލާންކޮށްފައެވެ. މި ކާފިއު އިއުލާންކޮށްފައިވަނީ ލޫޓުވުމުގެ މައްސަލަތައް އިތުރުވެފައިވާތީ ކަމަށް ރިޕޯޓުތައް ބުނެ އެވެ. އަދި ލޫޓުވުމުގެ މައްސަލަތައް ގިނަ ވެފައިވާތީ، ބައެއް ފަރާތްތަކުން ދަނީ އެމީހުންގެ ގެދޮރު ދޫކޮށް ރައްކާތެރި ހިސާބުތަކަށް ދިއުމަށް ދެކޮޅު ހަދަމުންނެވެ.

ކާފިއު ނެރެފައިވާ ވަގުތުތަކުގައި ބޭރަށް ނުކުމެ އުޅޭ މީހުންގެ އަދަބެއްގެ ގޮތުގައި 1000 ޑޮލަރުން ޖޫރިމަނާ ކުރުމާއެކު ހަ މަހަށް ޖަލަށް ލުމަށް ވަނީ ކަނޑައަޅާފައެވެ.

އޮފިޝަލުންނާ ހަވާލަދީ މީޑިޔާތަކުން ރިޕޯޓްކުރާ ގޮތުގައި މި ދަނޑިވަޅުގައި ފޭރުމުގެ ކުށުގައި އެއް ހިސާބަކުން އެކަނިވެސް 20 މީހަކު ހައްޔަރުކޮށްފައިވާ ކަމަށެވެ.

ސަލާމަތީ ބާރުތަކުން މިހާރުވެސް އަލިފާން ނިއްވުމުގައި ހަރަކާތްތެރިވާއިރު މިފަދަ ދަނޑިވަޅުތަކުގައި ކުށްތަކަށް އަރައިގަންނަ މީހުންގެ އަދަދު އިތުރުވާނެ ކަމަށްވެސް މިހާރު ދަނީ ބުނަމުންނެވެ.