ސްޕެޝަލް އިކޮނޮމިކް ޒޯން، އެސްއީޒެޑްގައި ހިންގާ އިގްތިސާދީ އެކިއެކި އިންވެސްޓްމަންޓްތަކުގެ އެންމެ ދަށް އަދަދަކީ 100 މިލިއަން ޑޮލަރު ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކަނޑައަޅުއްވައިފިއެވެ.

ސްޕެޝަލް އިކޮނޮމިކް ޒޯންގެ ގާނޫނުގައި ބުނާގޮތުން، އެސްއީޒެޑްގައި ހިންގިދާނެ އިގުތިސާދީ މަސައްކަތްތަކަކީ ކޮބައިކަމާއި، އެއިން ޒޯނެއްގައި ހިމެނޭ ޖުމުލަ އިންވެސްޓްމަންޓްގެ އެންމެ ކުޑަ މިންގަނޑަކީ ކޮބައިކަން، ބޯޑު އޮފް އިންވެސްޓްމަންޓްސްގެ މަޝްވަރާގެ މަތިން އަހަރަކު އެއްފަހަރު ރައީސްގެ ގަރާރަކުން ކަނޑައަޅަންޖެހެއެވެ.

އެހެންކަމުން ރައީސް ސޮއި ކުރައްވައި މިއަދު ވަނީ، އެސްއީޒެޑްގައި ހިންގިދާނެ އިގްތިސާދީ މަސައްކަތްތަކާއި އެއިން ޒޯނެއްގައި ހިމެނޭ ޖުމްލަ އިންވެސްޓްމަންޓުގެ އެންމެ ކުޑަ މިންގަނޑު ކަނޑައަޅައި ގެޒެޓު ކޮށްފައެވެ.

އެ އިއުލާނުގައިވާ ގޮތުން އެސްއީޒެޑްގައި ހިންގިދާނޭ އިގްތިސޯދީ މަސައްކަތްތަކެއްގެ ގޮތުގައި ކަނޑައަޅާފައިވަނީ، ޖުމްލަ 100 މިލިޔަން ޑޮލަރަށް ވުރެ ކުޑަ ނޫން އަދަދުގެ އިންވެސްޓްމަންޓާއި ޖުމްލަ 500 މިލިޔަން ޑޮލަރަށް ވުރެ ކުޑަ ނޫން އަދަދެއްގެ އިންވެސްޓްމަންޓް ހިމެނޭ ގޮތަށް ތަރައްގީކުރަން ހުށަހަޅާ ސަސްޓެއިނަބަލް ޓައުންޝިޕް ޑިވެލޮޕްމަންޓް މަޝްރޫއުތަކެވެ.

ސްޓްރެޓީޖިކް އިންވެސްޓްމަންޓުތަކުގެ ތެރެއިން، އިންވެސްޓްމަންޓެއް ހިމެނޭ ގޮތުން ގާއިމްކުރަން ހުށަހަޅާ ޖުމްލަ 100 މިލިޔަން ޑޮލަރަށް ވުރެ ކުޑަ ނޫން އަދަދެއްގެ އިންވެސްޓްމަންޓްގެ ތެރޭގައި ނުވަ ބާވަތެއްގެ އިންވެސްޓްމަންޓްގެ ލިސްޓެއް ވަނީ ގަރާރާއި އެކު އާންމުކޮށްފައެވެ.

އެއީ؛

1. އެކްސްޕޯޓަށް އިސްކަންދީގެން ހިންގާ މެނުފެކްޗަރިންގެ އެކި ބާވަތުގެ މަސައްކަތްތައް

2- ޓްރާންޝިޕްމަންޓް ޕޯޓް، އިންޓަނޭޝަނަލް ލޮޖިސްޓިކްސް، ޕޯޓް، އެއާޕޯޓް، ބަލްކް ބްރޭކިން، ބަންކަރިން، ޑޮކިން ސާވިސަސް

3- ޔުނިވާސިޓީ، ޓާޝަރީ ހޮސްޕިޓަލް، ސްޕެޝަލިޓީ ހޮސްޕިޓަލް، ދުނިޔޭގެ ފެންވަރުގެ ރިސާޗް އެންޑް ޑިވެލޮޕްމަންޓް ފެސިލިޓީތައް

4- ދުނިޔޭގެ ފެންވަރުގެ އިންފޮމޭޝަން ކޮމިއުނިކޭޝަން ޓެކްނޮލޮޖީ (އައިސީޓީ) ޕާކް، އައިސީޓީއާ ގުޅޭ ފެސިލިޓީތައް

5- އިންޓަނޭޝަނަލް ފައިނޭންޝަލް ސާވިސަސް، އިންޓަނޭޝަނަލް ޓްރޭޑް ސެންޓަރުތައް

6- އިއާދަކުރަނިވި ހަކަތައިގެ ދާއިރާ

7- ރާއްޖޭގައި ނެތް ޓެކްނޮލޮޖީއެއް ރާއްޖެއަށް އާންމުކުރަން ހިންގާ މަސައްކަތްތައް

8- ފުޑް ސެކިއުރިޓީގެ ދާއިރާ

9- ގޭސް އެކްސްޕްލޮރޭޝަންގެ މަސައްކަތްތައް

31 ޖަނަވަރީ 2024 ގައި ރައީސް ސޮއި ކުރައްވާ ނެރުއްވި ގަރާރުގައި ވެސް އެސްއީޒެޑްގައި ހިންގާ އިގްތިސާދީ އެކިއެކި އިންވެސްޓްމަންޓްތަކުގެ އެންމެ ދަށް އަދަދެއްގެ ގޮތުގައި ކަނޑައަޅުއްވާފައިވަނީ 100 މިލިއަން ޑޮލަރެވެ. އެސްއީޒެޑު ގާނޫނަކީ ކުރީގެ ރައީސް ޔާމީންގެ ވެެރިކަމުގައި ބޮޑެތި އިންވެސްޓްމަންޓްތައް ލިބޭނެކަމަށް ބަލައި އެކުލަވާލި ގާނޫނުކެވެ. ނަމަވެސް، މިހާތަނަށް އެސްއީޒެޑްގައި އެކަށީގެންވާ އިންވެސްޓްމަންޓެއް ކުރިއަށްދާގޮތް ވެފައެއް ނުވެއެވެ.