މާލޭގެ ޗާނދަނީމަގުގެ އުތުރުފަޅިން އިމާރާތެއް ކުރުމަށް ބިމެއް ކޮންނަނިކޮށް، އިހުޒަމާނުގައި ރާއްޖޭގައި ބޭނުންކުރި ޒާތުގެ ބޮޑުބަޑިއެއް ފެނިއްޖެއެވެ.

މި ބޮޑުބަޑި ފެނިފައިވަނީ، ކުރީގެ ހަބީބް ބޭންކް ހިންގި ޗާންދަނީމަގު 23 ނަންބަރު ފިހާރަ ހުރި ބިމުންނެވެ.

މި ބަޑި ފެނުމާއި ގުޅިގެން މިހާރުވަނީ ހެރިޓޭޖު މިނިސްޓްރީގެ ބެލުމުގެ ދަށަށް ގެންގޮސްފައެވެ. އަދި މި ބަޑި ފެނުމާއި ގުޅިގެން، ހެެރިޓޭޖު މިނިސްޓަރު އާދަމް ނަސީރު ބައެއް ނޫސްތަކަށް ވިދާޅުވީ، ބޮޑު ރަސްގެފާނު އޭގެ 14 ބޮޑު ބަޑި ބައްލަވައިގެންނެވިކަން އެނގެން އޮންނަކަމަށެވެ. އަދި ހަތްބަޑީގެ ސަލާމް ޖެހުމަށް ބޭނުންކުރާ އޭގެ ބަޑި ގައުމީ ދާރުލްއާސާރުގައި މިހާރުވެސް ހުންނާނެކަމަށް މިނިސްޓަރު ވިދާޅުވިއެވެ.

މިނިސްޓަރު ވިދާޅުވެފައިވަނީ މި ބަޑިއާއި ގުޅޭ އިތުރު މައުލޫމާތު ހޯދޭނީ ބަޑި ސާފުކޮށްގެން ކަމަށާއި މިހާރު އޮތީ ވަރަށް ބޮޑަށް ދަބަރު ޖަހާފައި ކަމަށެވެ. އަދި މި ބަޑި ސާފުކޮށް ދިރާސާތައް ކުރައްވާނެކަމަށާއި އޭގެފަހުން އާންމުންނަށް ބެލޭނެ ގޮތް ހައްދަވާނެކަމަށް ވެސް މިނިސްޓަރު ވިދާޅުވިއެވެ.

ހެރިޓޭޖް މިނިސްޓްރީން މި ބޮޑުބަޑި ގެނެސްފައިވަނީ އިމާރާތްކުރަން އެތަން ކޮނުނު މީހުން އޭތި ހުޅުމާލޭގައި ހުންނަ އެމީހުންގެ ސައިޓަކަށް ގެންގޮސްފައި ވަނިކޮށް އެ މައުލޫމާތު ލިބިގެން ކަމަށް މުއުތަބަރު ގޮތަކަށް މި ނޫހަށް ވަނީ އެނގިފައެވެ.