ބްރޯޑްކާސްޓިން ކޮމިޝަނުގެ ހުސްވެފައިވާ 2 ގޮނޑިއަށް މެންބަރުން އައްޔަނުކުރުމަށްޓަަކައި ރައީސް ޑރ. މުޙައްމަދު މުޢިއްޒު މަޖިލީހަށް ފޮނުއްވި ނަންތަކުގެ ތެރޭގައި ހިމެނޭ އިހަވަންދޫ ދާއިރާގެ ކުރީގެ މެމްބަރު މުހައްމަދު އަބްދުﷲ (މުހައްމާ) ލިސްޓުގެ ފަހަތަށް ވެއްޓި އަދި ދެ ވަނަ އަށް އޮތް އިބްރާހިމް މުއާޒު އަލީ (މުއާ) ކޮމިޓީގެ ލިސްޓުން ކަޓައިފިއެވެ.

އެ މަގާމަށް ހުޅުވާލުމުން ކުރިމަތިލި 12 މީހުންގެ ތެރެއިން ރައީސް އޮފީހުން މަޖިލީހަށް ފޮނުވި ލިސްޓްގެ އެންމެ ކުރީގައި އޮތީ މުހައްމާއާއި މުއާޒެވެ. ނަމަވެސް، ލިސްޓްގައި ތިބި މީހުންނަށް ކޮމެޓީ މަރުހަލާގައި ޕޮއިންޓް ދިނުމަށްފަހު މަޖިލީހުގެ ތަޅުމަށް ފޮނުވުމަށް ފާސްކުރި ލިސްޓްގައި، 79 ޕޮއިންޓާއިއެކު މުހައްމާއަށް ލިބިފައިވަނީ 3 ވަނައެވެ. އަދި މުއާޒަށް ލިބިފައިވަނީ 68 ޕޮއިންޓެވެ.

ކޮމެޓީން މާކްސް ދީފައިވާގޮތުން، އެއްވަނައިގައި މިހާރު އޮތީ، އެ ކޮމިޝަންގެ މެމްބަރުކަން ކުރިން ވެސް ކުރެއްވި އާމިނަތު ސަރާހަތު އިއްޒަތެވެ. ދެވަނައިގައި އޮތީ، ޕްރެޒެންޓަރެއްގެ ގޮތުގައި ގިނަ ދުވަސްތަކެއް ވަންދެން މަސައްކަތް ކުރައްވާފައިވާ ޝިފްޒާ މުސްތަފާއެވެ. އޭނާއަށް ވެސް ލިބިފައިވަނީ 84 ޕޮއިންޓެވެ.

މަޖިލީހުގެ ތަޅުމަށް ވޯޓަށް އެހުމަށް ފޮނުވާފައިވަނީ ކޮމެޓީން ކުރި އިންޓަވިއުގައި 75 އިންސައްތައަށްވުރެ މަތިން މާކްސްލިބުނު މީހުންގެ ނަންތަކެވެ. އެހެންކަމުން ރައީސްގެ ލިސްޓުން އެންމެ އިސްކަމެއްދެއްވި މުއާޒު ވަނީ ލިސްޓުން ކަޓާފައެވެ.

ބްރޯޑުކޮމްއަށް މެންބަރުން އައްޔަނު ކުރުމުގައި މައިގަަނޑު ގޮތެއްގައި މާކްސް ދެނީ ތައުލީމަށާއި އެ ދާއިރާގެ ތަޖުރިބާއަށް ބަލާފައެވެ.