ދިވެހި ޓީޗަރުންނާއި ލިޔުންތެރިން ލައްވައި ކެމްބްރިޖް އިމްތިހާނުގެ މުގައްރަރުތަކަށް ފެންވަރު ރަނގަޅު ފޮތްތަކާއި ޑިޖިޓަލް ކޮންޓެންޓު އުފެއްދުމުގެ ފުރުޞަތު ހުޅުވައިލަން ނިންމައިފި އެވެ.

މީސް މީޑިޔާގައި ކުރެއްވި ޕޯސްޓެއްގައި އެޑިއުކޭޝަން މިނިސްޓަރު ޑރ. އިސްމާއީލް ޝަފީފު ވިދާޅުވީ ފޮތްތައް ލިޔަން ޝައުގުވެރިވާ ޓީޗަރުންނަށް އަންނަ ހަފުތާގެ ތެރޭގައި އެ ފުރުސަތު ހުޅުވައިލާނެ ކަމަށެވެ.

މިނިސްޓަރ ވިދާޅުވީ ކެމްބްރިޖު އިމްތިހާނުގެ މުގައްރަރުތަކަށް ފެންވަރު ރަނގަޅު ފޮތްތަކާއި ޑިޖިޓަލް ކޮންޓެންޓު އުފެއްދުމުގެ ގާބިލުކަން ދިވެހިރާއްޖޭގެ މުދައްރިސުންގެ ކިބައިގައި ހުރިކަމަށް ގަބޫލުކުރައްވާ ކަމަށެވެ.

"މިނިސްޓްރީން ބޭރުން ގަނެގެން ދަރިވަރުންނަށް ފޯރުކޮށްދޭ ފޮތްތަކުގެ ބަދަލުގައި ގިނަ އިސްކޫލުތަކުގައި ދަރިވަރުން ބަރޯސާވަމުން ދަނީ ވެސް ރާއްޖޭގެ މުދައްރިސުން ތައްޔާރުކޮށް ދަރިވަރުންނަށްދޭ ނޯޓުތަކަށް. އަދި ބޭރުން ގަނެގެން މިހާރުދެވޭ މަސައްކަތުފޮތަށް ވުރެ މާ ފެންވަރުރަނގަޅު، ސީދާ އިމްތިހާނަށް އަމާޒުކުރެވިފައިވާ ފޮތްތައް ވެސް ރާއްޖޭގެ މުދައްރިސުން ތައްޔާރުކޮށްފައިވާކަން ފާހަގަކުރެވޭ." މިނިސްޓަރު ވިދާޅުވި އެވެ.

ފޮތްތައް ލިޔަން ފުރުސަތު ފަހިކޮށް އެކަށީގެންވާ އަގެއްގައި ދިވެހި މުދައްރިސުންނަށް ހުޅުވާލައިފި ނަމަ އޭގެ މަންފާ ބޮޑުވާނެ ކަމަށް ގަބޫލު ކުރައްވާ ކަމަށްވެސް މިނިސްޓަރު ވިދާޅުވިއެވެ. އަދި ފޮތްތައް ގަންނަން ބޭރަށް ކުރާ ހޭދަ ގައުމުގެ ތެރޭގައި ހިފެހެއްޓުމާއި، އެފަދަ ފޮތް ލިޔުމުގެ ހުނަރުވެރިކަން އިތުރުވުގެން ދިއުމާއި، މިހާރު ބޭރުން ގަނެގެން ދަރިވަރުންނަށް ފޯރުކޮށްދޭ ފޮތްތައް ބޭނުން ނުކުރުމުގެ ސަބަބުން ސްކޫލުތަކުން ނޯޓު ޕްރިންޓު ކުރުމަށް ކުރާ ހޭދަ ކުޑަކުރެވުމުގެ އިތުރަށް ތިމާވެއްޓާއި ރައްޓެހި އާދަކާދަތައް އަށަގަންނެވުމަށް އިތުރު ބާރަކަށް ވެސް މިކަން ވާނެ ކަމަށް މިނިސްޓަރ ޝަފީއު ވިދާޅުވި އެވެ.

މިނިސްޓަރ ވިދާޅުވީ މި އަންނަ ހަފްތާގައި ފޮތްތައް ލިޔަން ޝައުޤުވެރިވާ ފަރާތްތަކަށް ފުރުސަތު ހުޅުވާލާނެ ކަމަށެވެ. އަދި ފަރުދެއްގެ ގޮތުގައި ވެސް އަދި ޓީމެއްގެ ގޮތުގައި ވެސް ފޮތާއި ޑިޖިޓަލް ކޮންޓެންޓު ތައްޔާރުކޮށް ވިއްކަން ހުށަހެޅިދާނެ ކަމަށް މިނިސްޓަރ ވިދާޅުވިއެވެ. އަދި މިކަމުގައި ތަޖުރިބާ ހުރި މުދައްރިސުން އިސްނެންގެވުމަށް މިނިސްޓަރ އެދިވަޑައިގެންނެވިއެވެ.