ކަރަންޓުގެ މައްސަލަތައް ދިމާވާތީ ފެނަކައިގެ މެނޭޖިންގ ޑިރެކްޓަރ މޭޖަރ (ރިޓަޔާރޑް) މުޙައްމަދު ނަޖާޙް އަދި އިސްވެރިން އައްޑޫއަށް ނިސްބަތްވާ އެމްޕީންނާ ބައްދަލު ކުރައްވައިފިއެވެ.

ފެނަކައިން ބުނީ އައްޑޫ ސިޓީ ހިތަދޫ މެދު ދާއިރާގެ މެމްބަރ އަޙްމަދު އަޒާން މަރުޒޫޤު، ހުޅުދޫ ދާއިރާގެ މެމްބަރ މުޙައްމަދު ޝާހިދު، ފޭދޫ އުތުރު ދާއިރާގެ މެމްބަރ އިސްމާޢީލް ނިޒާރު އަދި ހިތަދޫ އުތުރު ދާއިރާގެ މެމްބަރ މުޙައްމަދު ސިނާން އާއި ބައްދަލުކޮށް އައްޑޫ ސިޓީ އަށް ދިމާވެފައިވާ ކަރަންޓުގެ ޙާލަތާއި ގުޅޭގޮތުން މަޝްވަރާ ކުރެވިފައިވާ ކަމަށެވެ. މި މަޝްވަރާތަކުގެ ތަފްސީލެއް އަދި އެ ކުންފުނިން ހާމަކޮށްފައެއް ނުވެއެވެ.

ކަރަންޓު ފޯރުކޮށްދިނުމަށް ބޭނުންކުރަމުންދާ އިންޖީނަށް ދިމާވި މައްސަލަ ހައްލުނުކުރެވި އައްޑޫސިޓީގެ ގުޅިފައިވާ ރައްތަކުން ކަރަންޓު ކަނޑާތާ ހަފްތާއަކަށްވުރެ ގިނަ ދުވަސް ވަނީ ވެފައެވެ.

ރާއްޖޭގައި ދެވަނައަށް އެންމެ ބޮޑު އާބާދީއެއް ދިރިއުޅެމުންދާ އައްޑޫއިން ފާއިތުވި ހަފްތާއިން ފެށިގެން ކޮންމެ ދުވަހަކުގެވެސް އެކި ހިސާބުތަކުން ދަނީ ކަރަންޓު ކަނޑަމުންނެވެ. މިކަމުގެ ސަބަބުން މި ހިދުމަތް ބޭނުންކުރާ ފަރާތްތަކުން ދަނީ ކަންބޮޑުވުން ފާޅުކުރަމުންނެވެ. އެގޮތުން ބައެއް ފަރާތްތަކުން ބުނަނީ މެންދުރުގެ އެންމެ ހޫނު ވަގުތުގައިވެސް ކަރަންޓު ކަނޑާލާ ކަމަށެވެ.

ކަރަންޓުގެ މައްސަލަ ދިމާވާތީ އައްޑޫގެ ސްކޫލްތަކުންވެސް ކަރަންޓު ކަނޑަމުންދާއިރު ޓިއުޝަންދޭ ވަގުތުތަކުގައިވެސް ކަރަންޓު ކަނޑަމުނަދާތީ ކުދިންގެ ކިޔެވުމަށްވެސް ދަނީ މިކަމުގެ އަސަރު ކުރަމުންނެވެ.

”ސްކޫލް ވަގުތުގައި ކަރަންޓު ކަނޑައިގެން އެއް ދުވަހަކު ސްކޫލުން ކުދިން ގެއަށްވެސް ވަނީ ފޮނުވާފައި. މެންދުރުގެ އެންމެ ހޫނު ވަގުތުގައިވެސް ކަރަންޓު ކަނޑާލާ.“ މި ނޫހަށް މައުލޫމާތު ދެއްވަމުން އައްޑޫގެ ރައްޔިތަކު ކިޔައިދިނެވެ.

އައްޑޫގައި ކަރަންޓުގެ ހިދުމަތް ފޯރުކޮށްދެމުންދާ ފެނަކަ އިން ބުނީ މިހާރު އައްޑޫގައި ކަރަންޓުގެ ހިދުމަތް ކަނޑަމުން ދަނީ އައްޑޫ ސީޕީއެސްގެ ޖެންސެޓްތަކަކަށް މައްސަލަ ދިމާވެ، ކަރަންޓުގެ ހިދުމަތަށް ބުރޫއަރާފައިވާތީ ކަމަށެވެ. މި މައްސަލަ ހައްލުކުރަން ޖެންސެޓްތަކަށް ބޭނުންވާ ސްޕެއާ ޕާޓްސް ހޯދުމުގެ މަސައްކަތް ކުރަމުންދާ ކަމަށާއި އެގޮތުން ސްޕެއާ ޕާޓްސް ލިބި، އެއް ޖެންސެޓުގެ މައްސަލަ މާދަމާ ހައްލުވާނެ ކަމަށް ފެނަކަ އިން ނެރުނު ބަޔާނުގައި ބުނެފައިވެއެވެ.

ފެނަކައިން ބުނީ ސްޕެއާ ޕާޓްސް ލިބުނުހާ އަވަހަކަށް، ދެން ހުރި ޖެންސެޓުތައް ހައްލުކުރުމަށް މަސައްކަތް ކުރެވޭނެ ކަމަށާއި މި މައްސަލަ ހައްލުވަންދެން ކަރަންޓު ލޯޑް ހިފެހެއްޓުމަށްޓަކައި، ގުޅިފައިވާ ރަށްތަކުގެ އެކި ސަރަހައްދުތަކުން، އެކުލަވާލެވޭ ތާވަލާއި އެއްގޮތަށް، ކަރަންޓު ކެނޑުމަށް ހަމަޖެހިފައިވާ ކަމަށެވެ.

މިކަމުގެ ސަބަބުން އައްޑޫގެ ގުޅިފައިވާ ރަށްތަކުގެ ރައްޔިތުންނަށް ދިމާވާނެ ދަތިތަކަށް ނިހާޔަތަށް މައާފަށް އެދޭ ކަމަށާއި މި މައްސަލަ ވީހާވެސް އަވަހަކަށް ހައްލުކޮށް ކަރަންޓުގެ ހިދުމަތް އާއްމު ހާލަތަކަށް ގެންނަން މެދުނުކެނޑި މަސައްކަތް ކުރަމުންދާ ކަމަށްވެސް ފެނަކައިން ނެރުނު ބަޔާނުގައިވެ އެވެ.