2016 ވަނަ އަހަރުގެ ޖޫން މަހުގެ 3 ވަނަ ދުވަހުގެ ރޭ މާލޭގައި ވަޅިން ހަމަލާދީ މ. ސަރުމާގޭ އުމުރުން 14 އަހަރުގެ ފާތިރު މުހައްމަދު އަލީ މަރާލި މައްސަލައިގައި ދަޢުވާ އުފުލާފައިވާ މ. ކުރިރުއްގޭ އިރުފާން ރުޝްދީގެ ޝަރީޢަތުގެ އަޑުއެހުމެއް މިއަދު ކްރިމިނަލް ކޯޓުގައި ކުރިއަށް ގެންގޮސްފިއެވެ.

ފާތިރު މަރާލާފައިވަނީ ގްރޫޕަކުން މ. ސަރުމާ ގެއަށް ވަދެ ތޫނު އެއްޗެހި ބޭނުންކޮށްގެން ދިން ހަމަލާއެއްގައެވެ. އޭނާއަށް ޙަމަލާދިނީ ކ. ކާށިދޫ ރަންފަރުގެ އަހްމަދު އިރުޝާން ހިލްމީ މަރާލި މައްސަލައިގެ ބަދަލުހިފުމުގެ ގޮތުން ކަމަށް ފުލުހުން ވަނީ ބުނެފައެވެ. އެ ހަމަލާއަށް ފަހު އައިޖީއެމްއެޗް ހޮސްޕިޓަލަށް ފާތިރު ގެންދިޔައިރުވެސް އޭނާ ނިޔާވެފައިވާ ކަމަށް ފުލުހުން ބުނެފައިވެ އެވެ.

ފާތިރުގެ މަރުގެ މައްސަލާގައި އިރުފާންގެ މައްޗަށް ދަޢުލަތުން އުފުލާފައިވަނީ ނުރައްކާތެރި ހަތިޔާރެއް ބޭނުންކޮށްގެން ގަސްތުގައި މީހަކު މެރުމަށް އެހީތެރިވުމުގެ ކުށުގެ ދައުވާއެވެ.

ކްރިމިނަލް ކޯޓުގައި މިއަދު ކުރިއަށް ގެންދިއުމަށް ތާވަލު ކޮށްފައިއޮތީ ދައުލަތުން ހުށަހަޅާފައިވާ ސިއްރު ހެކިންގެ ހެކިބަސް ނެގުމެވެ. ނަމަވެސް ސިއްރު ހެކިވެރިންނަށް މި އަޑުއެހުމުގައި ބައިވެރިވެވޭގޮތް ވަނީ ނުވެފައެވެ.

އެހެންކަމުން އިރުފާންގެ ދިފާއީ ވަކީލު މިއަދު ވިދާޅުވީ، މައްސަލާގައި ގިނަ ދުވަސްތަކެއް ފާއިތުވެފައިވާތީ ދެން އޮންނަ އަޑުއެހުމަކަށް މަޤްބޫލު ސަބަބެއްނެތި ހެކިން ހާޒިރު ނުވެއްޖެނަމަ އިތުރު ފުރުސަތެއް ނުދެއްވުމަށް އެދޭ ކަމަށެވެ.

އެކަމާގުޅިގެން މައްސަލަ ބައްލަވާ ޤާޟީ އިބްރާހިމް ޛިހުނީ ވިދާޅުވީ ދެން ސިއްރު ހެކިންގެ ހެކިބަސް ނެގުމަށް ތާވަލުކުރެވޭނީ ފެބްރުއަރީ މަސް ތެރޭގައި ކަމަށެވެ. އެގޮތުން ފެބްރުއަރީ މަހު ތާވަލު ކުރާ 2 އަޑުއެހުމުގައި ދައުލަތުގެ ހެކިންގެ ހެކިބަސް ނަގާ ނިންމަވާނެ ކަމަށް ޤާޟީ ވިދާޅުވިއެވެ.

މި މައްސަލައިގައި ގދ. ތިނަދޫ، ލަވްނެސްޓް، 15 އަހަރުގެ އިބާދަތު ލަތީފުގެ މައްޗަށްވެސް ދަޢުލަތުން ދަޢުވާ އުފުލިއެވެ. އޭނާގެ މައްޗަށް ދަޢުލަތުން އުފުލީ ތޫނު އެއްޗެއް ބޭނުންކޮށްގެން ގަސްތުގައި މީހަކު މެރުމުގެ ދައުވާއެވެ.

ފާތިރުގެ މަރުގެ މައްސަލާގައި 2016 ވަނަ އަހަރުން ފެށިގެން އިރުފާން ހޯދުމަށް ފުލުހުން މަސައްކަތްކުރި ނަމަވެސް އޭނާ ފެނިފައި ވަނީ 2019 ވަނަ އަހަރުގެ އޮކްޓޯބަރު މަހުގެ 25 ވަނަ ދުވަހުގެ ރޭގެ ވަގުތެއްގައެވެ. އޭނާ ފެނުނީ ގދ. ތިނަދޫ އާއި 15 މޭލު ބޭރުން އޮޔާދިޔަ ލޯންޗެއްގައި ހުއްޓައެވެ.