ރަހުމު ކުޑަކޮށް މަރާލާފައި އޮއްވާ ފެނުނު ޝިއާއު މުޙައްމަދު ސައީދުގެ މަރުގެ މައްސަލައިގައި ފ. ނިލަންދޫ، ފިނިފެންމާގެ، ޢަލީ ސާހިލްގެ މައްޗަށް ދަޢުލަތުން އުފުލާފައިވާ ދަޢުވާތަކުގެ ޝަރީޢަތުގެ އަޑުއެހުމެއް ކްރިމިނަލް ކޯޓުގައި މިއަދު ކުރިއަށް ގެންގޮސްފިއެވެ.

06 އޮގަސްޓު 2022 ދުވަހުގެ ރޭ ހ. ޝީރީންވިލާގޭގައި، ތޫނުއެއްޗަކުން ޙަމަލާދީ ޝިއާއު މަރާލި މައްސަލައިގައި ފ. ނިލަންދޫ، ފިނިފެންމާގެ، ޢަލީ ސާހިލްގެ މައްޗަށް ދަޢުލަތުން އުފުލާފައިވަނީ ތޫނު އެއްޗެއް ބޭނުންކޮށްގެން ޤަޞްދުގައި މީހަކު މެރުމުގެ ކުށުގެ ދަޢުވާ އާއި އިތުރު 4 ދަޢުވާއާއެކު، ޖުމްލަ 5 ދަޢުވާއެކެވެ.

މި މައްސަލައިގެ އަޑުއެހުންތައް ކްރިމިނަލް ކޯޓުގައި ކުރިއަށް ގެންދަނީ ސިއްރުކޮށްގެންނެވެ.

މިއަދުގެ އަޑުއެހުމުގައި ދައުލަތުން ވަނީ 9 ހެއްކެއްގެ ހެކިބަސް ސިއްރުން ނެގުމަށް ހުށައަޅާފައެވެ. އަދި ސާހިލްގެ ފަރާތުން އޭނާ ތަހުގީގަށް ދީފައިވާ ބަޔާން ބަލައިނުގަތުމަށް ހުށަހެޅި ނަމަވެސް އެ ބަޔާން ބަލައިގަތުމަށް ކޯޓުން ވަނީ ނިންމާފައެވެ.

ކްރިމިނަލް ކޯޓުން މިއަދު ވަނީ މިމައްސަލައިގެ އިބްތިދާއީ މަރުޙަލާ ނިިންމާލާފައެވެ. އޭގެއިތުރުން ދެން އޮންނާނީ ޝަރީއަތުގެ މަރުޙަލާ ކުރިއަށް ގެންދިއުން ކަމަށް ކްރިމިނަލް ކޯޓުން ވަނީ ބުނެފައެވެ.

2022 އޯގަސްޓު މަހުގެ 6 ވަނަ ދުވަހު ހ. ޝީރީންވިލާގައި މަރާލާފައި އޮއްވާ ޝިއާއުގެ ހަށިގަނޑު ފެނުނުއިރު އޭނާގެ ހަށިގަނޑުގެ ބައެއް ގުނަވަންތައް ވަކިކޮށް ހަށިގަނޑަށް ބޮޑެތި އަނިޔާތަކެއް ދީފައިވާކަމަށް ފުލުހުން ހާމަކޮށްފައިވެއެވެ.