ފަލަސްތީނުގެ ޣައްޒާގައި ދެމުން ގެންދާ ހަމަލާތައް ހުއްޓާލުމަށާއި ހަމާސް އިން ރަހީނުކޮށްފައިވާ އިޒްރޭލު މީހުން މިނިވަންކުރުމަށް ދެ ފަރާތުން އެއްބަސްވެފައިވާ ކަަމަށް ރިޕޯޓްތައް ބުނެފިއެވެ.

އިސްރާއިލާ ޣައްޒާ ހަނގުރާމަ ހުއްޓާލަން ނިންމާފައިވަނީ ގަތަރު މެދުވެރިއެއްގެ ދައުރު އަދާކޮށްގެން ކުރިއަށްގެންދިޔަ މަޝްވަރާތަކުގައި އެކުލަވާލި އެއްބަސްވުމަށް އިޒްރޭލާއި ހަމާސް އިން ވެސް ރުހުން ދިނުމާއި ގުޅިގެންނެވެ. ހަނގުރާމަ ހުއްޓާލަން ނިންމުމާއި ގުޅިގެެން ޣައްޒާގެ އެތަށް ހާސްބަޔަކު އަންނަނީ މަގުތަކަށް ނިކުމެ އުފާފާޅުކުރަމުންނެވެ.

މި އެއްބަސްވުމުގައި ހަމަލާތައް ހުއްޓާލުމުގެ އިތުރުން ހަމާސް އިން ރަހީނުކޮށްފައިވާ އިޒްރޭލު މީހުން މިނިވަން ކުރުން ވެސް ހިމެނެ އެވެ. އަދި އިޒްރޭލުން ހައްޔަރުކޮށްފައިވާ ފަލަސްތީނު ރައްޔިތުން ވެސް މި އެއްބަސްވުމުގެ ދަށުން މިނިވަން ކުރުމަށް ހަމަޖެހިފައިވާ ކަމަށް ރިޕޯޓް ތައް ބުނެއެވެ.

އިޒްރޭލުން ފަލަސްތީނަށް ހަމަލާދޭން ފެށީ 2023 ވަނަ އަހަރުގެ އޮކްޓޫބަރު މަހުގެ 7 ވަނަދުވަހުއެވެ. އެ ހަމަލާތަކުގައި ގާޒާ އިން 46،000 އަށް ވުރެ ގިނަ މީހުން ވަނީ ޝަހީދުވެ، 109،378 މީހަކަށް އެކި ވަރުގެ އަނިޔާތައް ލިބިފައިވެއެވެ.

ހަނގުރާމައިގެ ސަބަބުން ގާޒާގެ 85 ޕަސެންޓު މީހުން ގެދޮރު ދޫކޮށް ވަނީ ގޮސްފައެވެ. ހަނގުރާމައިގެ ސަބަބުން ގާޒާގެ ބައި މިލިއަނެއްހާ މީހުން ބަޑުހައިހޫނުކަން ތަހައްމަލު ކުރަމުންދާކަމަށް ރިޕޯޓްތައް ބުނެއެެވެ.