އިޒްރޭލުން ފަލަސްތީނުގެ ޢައްޒާއަށް ދޭ ހަމަލާތައް ހުއްޓާލުމުގެ އެއްބަސްވުން ދަމަހައްޓަން ރައީސް ޑރ. މުހައްމަދު މުއިއްޒު ގޮވާލައްވައިފިއެވެ.

އިޒްރޭލުން ފަލަސްތީނުގެ ޢައްޒާއަށް ދޭ ހަމަލާތައް ހުއްޓާލުމަށް އެއްބަސްވުމާއި ގުޅިގެން އެކަމަށް މަރުހަބާ ވިދާޅުވެ ރައީސް މުޢިއްޒު އެކްސްގައި ކުރެއްވި ޕޯސްޓެއްގައި ވިދާޅުވީ ހަނގުރާމައަށް 15 މަސް ފަހުން ހަމަލާތައް ހުއްޓާލަން އެއްބަސްވި ޚަބަރު އަޑުއިވިވަޑައިގަތުމުން ހިތްޕުޅުހަމަޖެހުނު ކަމަށެވެ.

އަދި މި ނިންމުމަށް ވާސިލުވާން އެހީތެރިވެދިން ގައުމުތައް ކުރި މަސައްކަތް ރާއްޖެއިން ބަލައިގަންނަ ކަމަށް ރައީސް މުޢިއްޒު ވިދާޅުވިއެވެެ. އެމަނިކުފާނު ވަނީ ހަނގުރާމަ ހުއްޓާލުން ދެމެހެއްޓުމަށާއި، ހިޖުރަކޮށްފައިވާ މީހުން އެނބުރި ގައުމަށް އާދެވޭކަން ކަށަވަރުކޮށް އިންސާނީ އެހީ ފޯރުކޮށްދިނުމަށް ކަމާގުޅުންހުރި ފަރާތްތަކަށް ގޮވައިލައްވާފައެވެ.

އަދި ފަލަސްތީނު އަލުން އާބާދުކުރުމަށް ބޭނުންވާ ސަޕޯޓު ވަގުތުން ފޯރުކޮށްދިނުމަށް ވެސް ރައީސް ގޮވައިލެއްވިއެވެެ.

އިޒްރޭލުން ފަލަސްތީނުގެ ޢައްޒާއަށް ދެމުންގެންދާ ހަމަލާތައް ހުއްޓާލުމަށާއި ހަމާސްއިން ރަހީނުކޮށްފައިވާ އިޒްރޭލު މީހުން މިނިވަން ކުރަން ދެފަރާތުން ރޭ ވަނީ އެއްބަސްވެފައެވެ.

ޣައްޒާ ހަނގުރާމަ ހުއްޓާލަން ނިންމާފައިވަނީ ގަތަރު މެދުވެރިއެއްގެ ދައުރު އަދާކޮށްގެން ކުރިއަށްގެންދިޔަ މަޝްވަރާތަކުގައި އެކުލަވާލި އެއްބަސްވުމަށް އިޒްރޭލާއި ހަމާސް އިން ވެސް ރުހުން ދިނުމާއި ގުޅިގެންނެވެ. ހަނގުރާމަ ހުއްޓާލަން ނިންމުމާއި ގުޅިގެެން ޣައްޒާގެ އެތަށް ހާސްބަޔަކު އަންނަނީ މަގުތަކަށް ނިކުމެ އުފާފާޅުކުރަމުންނެވެ.

އިޒްރޭލުން ފަލަސްތީނަށް ހަމަލާދޭން ފެށީ 2023 ވަނަ އަހަރުގެ އޮކްޓޫބަރު މަހުގެ 7 ވަނަދުވަހުއެވެ. އެ ހަމަލާތަކުގައި ގާޒާ އިން 46،000 އަށް ވުރެ ގިނަ މީހުން ޝަހީދުވެ، 109،378 މީހަކަށް އެކި ވަރުގެ އަނިޔާތައް ލިބިފައިވެއެވެ.