ބިންވެރިޔާ ސްކީމުގެ ތެރެއިން ހައްގު ނޫން ބަޔަކަށް ގޯތި ދިން މައްސަލައިގައި އެޗްޑީސީގެ ކުރީގެ މެނޭޖިން ޑިރެކްޓަރު އިބްރާހީމް ފަޒުލް ރަޝީދުގެ މައްޗަށް ކުރަނީ، އެ ތަނުގެ ރަސްމީ ލިޔެކިޔުންތަކެއް ނައްތައިލަން އުޅުނު ކަމުގެ ތުހުމަތު ކަމަށް ފުލުހުން ބުނެފިއެވެ.

ފުލުހުންގެ ޚިދުމަތުން ބުނީ ފަޒުލްގެ މައްޗަށް ކުރެވޭ ތުހުމަތުތަކާއެކު، މައްސަލައިގެ ތަހުގީގަށް އޭނާއާ ސުވާލުކޮށް ބަޔާން ނަގާފައިވާ ކަމަށެވެ. އަދި އޭނާ ފުރުން މަނާކުރުމަށް ނެރުނު އަމުރު އަދި ވެސް ދެމި އޮތް ކަމަށް ފުލުހުން ބުނެއެވެ.

ފުލުހުން އިތުރަށް ބުނީ މި މައްސަލައިގައި ފަޒުލްގެ މައްޗަށް ކުރަނީ، އެޗްޑީސީގެ ރަސްމީ ލިޔެކިޔުންތަކެއް ނައްތައިލަން މަސައްކަތް ކުރި ކަމުގެ ތުހުމަތު ކަމަށެވެ.

މި މައްސަލައިގެ ތަހުގީގަށް ފުލުހުން ފަޒުލްގެ ގެ ބަލައި ފާސްކުރިއިރު ދަބަހެއްގެ ތެރެއިން މިލިއަނަކަށްވުރެ ގިނަ ރުފިޔާ ފެނިފައިވާކަން ފުލުހުން މީގެ ކުރިން ވަނީ ހާމަކޮށްފައެވެ.

ފަޒުލްގެ މައްޗަށް ކުރެވުނު ކޮރަޕްޝަންގެ ތުހުމަތުތަކާއެކު ސަސްޕެންޑްކުރުމުން ފަހުން އޭނާ ވަނީ މަގާމުން އިސްތިއުފާ ދެއްވާފައެވެ. މަގާމުން އިސްތިއުފާ ދެއްވުމަށް ފޮނުވި ސިޓީގައި ފަޒުލް ވަނީ އޭނާގެ މައްޗަށް ކުރެވޭ ތުހުމަތުތަކަށް އިންކާރުކުރަށްވާފައެވެ.