ދުނިޔޭގެ ސިއްހަތު ޖަމިއްޔާ، ޑަބްލިއުއެޗްއޯގެ މަސައްކަތް ވަރަށް ދޯދިޔާ ކަމަށް ބުނެ މެމްބަރު ކަމުން ވަކިވާން އެމެރިކާއިން ނިންމައިފިއެވެ.

އެމެރިކާއިން ޑަބްލިއުއެޗްއޯގެ މެންބަރުކަން ދޫކޮށްލަން ނިންމައި ރަސްމީ ލިޔެކިޔުންތަކުގައި ސޮއިކުރައްވާފައި ވަނީ އެގައުމުގެ އާ ރައީސް ޑޮނަލްޑް ޓްރަމްޕްއެވެ. ރައީސް ކަމުގެ މަގާމާ ހަވާލުވެވަޑައިގެން ފުރަތަމަ ދުވަހު ކުރެއްވުމަށް ވައުދުވެވަޑައިގެންފައިވާ ކަންކަމުގެ ތެރޭގައި ހިމެނޭ ޑަބްލިއުއެޗްއޯގެ މެންބަރުކަން ދޫކޮށްލާ ގަރާރުގައި ޓްރަމްޕް މިހާރު ވަނީ ސޮއިކުރައްވައިފައެވެ.

މި ގަރާރުގައި ރައީސް ޓްރަމްޕް ސޮއިކުރެއްވުމާއެކު އެ ގައުމުގެ ކަމާބެހޭ އިދާރާތަކުން ވަނީ ޑަބްލިއުއެޗްއޯއިން ވަކިވުމުގެ މަސައްކަތް ފަށާފައިވާކަމަށް ބުނެފައެވެ.

މި ގަރާރުގައި ސޮއިކުރަން ޖެހުނު އެންމެ ބޮޑު އެއް ސަބަބަކީ ކޮވިޑްގެ ބަލިމަޑުކަމުން އަރައިގަތުމަށް ޑަބްލިއުއެޗްއޯއިން ކުރި މަސައްކަތް ވަރަށް ދޯދިޔާ ކަމަށް ބުނެއެވެ. މި ގަރާރުގައި ފާހަގަކޮށްފައިވާ ގޮތުގައި މިދިޔަ ދުވަސްތަކުގެ ތެރޭގައި، ޑަބްލިޔުއެޗްއޯގެ ކަންކަން ހަރުދަނާކޮށް ރަނގަޅުކުރުމަށް މަސައްކަތެއް ކޮށްފައިވެސް ނުވާކަން ފާހަގަކޮށްފައިވެއެވެ.

ޑަބްލިއުއެޗްއޯ އަށް ފަންޑު ކުރުމުގައި އެންމެ ބޮޑު އަދަދެއް ދޭ ގައުމުތަކުގެ ތެރޭގައި އެމެރިކާ ހިމެނެއެވެ. އަދި ޑަބްލިއުއެޗްއޯގެ މެންބަރުކަމުން އެމެރިކާ ވަކިވެއްޖެ ނަމަ އެގައުމުން އެ އިދާރާއަށް ދޭ އެހީ ކެނޑި ދަތިތަކާއި ކުރިމަތިވާނެކަމަށް ބެލެވޭ ކަމުގައި ރިޕޯޓުތައް ބުނެއެވެ.