މޯލްޑިވްސް ބްރޯޑްކާސްޓިން ކޮމިޝަންގެ ނައިބު ރައީސް މުހައްމަދު ފަޒީންގެ ޖިންސީ ފުރައްސާރައިގެ މައްސަލައެއް ރައްޔިތުންގެ މަޖިލިހުގެ މިނިވަން މުއައްސަސާތަކުގެ ކޮމިޓީން ބަލަން ފަށައިފިއެވެ.

ރައްޔިތުންގެ މަޖިލިހުގެ މިނިވަން މުއައްސަސާތަކުގެ ކޮމިޓީން ބަލަން ފަށާފައި ވަނީ ބްރޯޑްކޮމްގެ އަންހެން މުވައްޒަފަކަށް ފަޒީން ޖިންސީ ފުރުއްސާރަކުރި ކަމަށް ތުހުމަތު ކުރެވޭ މައްސަލައެކެވެ.

ރާއްޖޭގެ ބައެއް މީޑިއާތަކުން ރިޕޯޓުކޮށްފައިވާ ގޮތުގައި މި މައްސަލަ މިނިވަން މުއައްސަސާތަކުގެ ކޮމިޓީއަށް ހުށަހެޅުމުން އެ ކޮމިޓީގެ ސިއްރު ބައްދަލުވުމެއް އިއްޔެ ވަނީ ބާއްވައިފައެވެ.

ފަޒީންގެ މައްސަލަ ބަލަމުންދާއިރު މި މައްސަލައާ ގުޅިގެން އޭނާ އެއްވެސް މައުލޫމާތެއް އަދި ހިއްސާކޮށްފައެއް ނުވެއެވެ. ނަމަވެސް އޭނާއާ ގުޅޭ މައްސަލައެއް ކޮމިޓީން ބަލަމުންދާ ކަމަށް ވަނީ ވިދާޅުވެފައެވެ.

ބްރޯޑްކޮމްއަށް ފަޒީން އައްޔަންކުރީ މާރިޗް 7، 2021 ގައެވެ. އެ ކޮމިޝަނުގެ ނައިބު ރައީސްގެ މަގާމަށް އޭނާ އައްޔަންކޮށްފައިވަނީ 19 ޖެނުއަރީ 2023ގައެވެ. އޭނާ ކުރިން ވަނީ ސީއެންއެމް އަދި ރާއްޖެ ޓީވީގައި ނޫސްވެރިއެއްގެ ގޮތުގައި މަސައްކަތް ކުރައްވައިފައެވެ.