ޔަމަނުގެ ދިފާއުގައި ހަނގުރާމަ ކުރާ އެގައުމުގެ ސަރުކާރު ބަލައިގެންފައިވާ ހޫތީންނަކީ ނިރުބަވެރި ޖަމާއަތެއްގެ ގޮތުގައި އަލުން ލިސްޓު ކުރުމުގެ މަސައްކަތް އެމެރިކާގެ ރައީސް ޑޮނަލްޑް ޓްރަމްޕް ފަށްޓަވައިފިއެވެ.

ޑޮނަލްޑް ޓްރަމްޕުގެ ސަރުކާރުން ޔަމަނުގެ ހޫތީންނަކީ "ބިދޭސީ ނިރުބަވެރި ޖަމިއްޔާއެއްގެ ގޮތުގައި" ކަނޑައެޅުމުގެ މަރުހަލާއެއް ފަށާފައިވާ ކަމަށް ވައިޓް ހައުސްއިން ރަސްމީކޮށް މިހާރު ވަނީ ބުނެފަ އެވެ. އެގޮތުން ބުދަ ދުވަހު ސޮއިކުރެއްވި ޓްރަމްޕްގެ އެގްޒެކެޓިވް އަމުރުގައި ސެކްރެޓަރީ އޮފް ސްޓޭޓް މާކޯ ރޫބިއޯ އަށް އަންގާފައި ވަނީ ޑިރެކްޓަރ އޮފް ނޭޝަނަލް އިންޓެލިޖެންސް އާއި ޓްރެޝަރީގެ ސެކްރެޓަރީއާ މަޝްވަރާ ކުރުމަށް ފަހު 30 ދުވަހުގެ ތެރޭގައި މިކަމާ ގުޅޭ ރިޕޯޓެއް ހުށަހެޅުމަށެވެ.

ޓްރަމްޕް ވަނީ އޭނާ އެމެރިކާގެ ރައީސްގެ މަގާމުގައި ހުންނެވި ފުރަތަމަ ދައުރުގެ އެންމެ ފަހު ދުވަސްތަކުގައި ޔަމަނުގެ ހޫތީންނަކީ "ބިދޭސީ ނިރުބަވެރި ޖަމާއަތެއް" ގޮތަށާއި "ސްޕެޝަލީ ޑެޒިގޭޓެޑް ގްލޯބަލް ޓެރަރިސްޓް" (އެސްޑީޖީޓީ) ޖަމާއަތެއްގެ ގޮތުގައި ލިސްޓްކޮށްފަ އެވެ.

އެމެރިކާއިން ހޫތީންނަށް ފިޔަވަޅު އަޅަން ނިންމި މައިގަނޑު ސަބަބެއް ކަމަށް މަސްރަހު ދިރާސާކުރައްވާ ފަރާތްތަކުން ބުނަނީ ޔަމަނުގެ ދިފާއުގައްޔާއި ފަލަސްތީނުގެ ރައްޔިތުންގެ ދިފާއުގައި އެ ޖަމާއަތުން ކުރަމުންދާ މަސައްކަތެވެ.

ނިރުބަވެރި އިސްރާއީލަށް އެމެރިކާއިން ހަތިޔާރުފޯރުކޮށްދިނުމުން އެކަން ހުއްޓާލުމަށް އެންމެ ބޮޑަށް މަސައްކަތް ކުރީ ހޫތީންނެވެ. އެގޮތުން އެ ޖަމާއަތުން ވަނީ ޔަމަނުން ކޮންޓްރޯން ކުރާ ރަތް ކަނޑު ހުރަސްކުރާ އެމެރިކާގެ މަނަވަރުތަކަށާއި އިސްރާއީލަށް ވާގިވެރިވާ މަނަވަރުތަކަށް ހަމަލާދީފައެވެ. މި ހަމަލާތަކުގައި އެ މަނަވަރުތަކަށް ބޮޑެތި ގެއްލުންތައް ވިކަން ފާހަގަ ކުރެވެއެވެ.