ރ. ފައިނުގައި އެއަރޕޯޓް ތަރައްޤީކުރުމުގެ އެއްބަސްވުމުގައި އަންނަ މަހު ސޮއިކޮށް، ވަރަށް އަވަހަށް އަމަލީ މަސައްކަތް ފެށިގެންދާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ ފައިނުގެ ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައެވެ. ރައީސް ޑރ.މުހައްމަދު މުޢިއްޒު ވިދާޅުވީ ރިޔާސީ އިންތިޚާބުގެ ކެމްޕެއިންގައި ވަޢުދުވެވަޑައިގެންނެވި އަދި ރައްޔިތުންގެ އުންމީދާ ގުޅިފައިވާ އެންމެ މުހިންމު މަޝްރޫޢަކީ ފައިނު އެއަރޕޯޓު ތަރައްޤީކުރުންކަމަށެވެ. އަދި އެ މަސައްކަތްކުރުމަށް އެމްޓީސީސީއާއެކު އަންނަ ފެބުރުއަރީ މަހު އެއްބަސްވުމުގައި ސޮއިކުރުމަށް ނިންމާފައިވާ ކަމަށާއި އެކަމުގެ ޢަމަލީ މަސައްކަތް ވަރަށް އަވަހަށް ފެށޭނެކަމަށްވެސް ރައީސް މުއިއްޒު ވިދާޅުވިއެވެ.

"ދެން އަޅުގަނޑު އިރާދަކުރެއްވިއްޔާ މި ރަށަށް އަންނާނީ މި އެއާޕޯޓުގެ ހުޅުވަން." ރައީސް ވިދާޅުވިއެވެ.

މީގެ އިތުރުން ރައީސް މުއިއްޒު ވިދާޅުވީ ރ. އަތޮޅުގައި ގިނަ ރިސޯޓްތަކެއް ހަދުމަކީ އެމަނިކުފާނު ވަޢުދުވެވަޑައިގެންފައިވާ ކަމެއް ކަމަށެވެ. އެއާޕޯޓް މަޝްރޫއަކީ އެކަމަށް ގިނަ ފުރުޞަތު ލިބި އިޤްތިޞާދީ ނަފާ ލިބޭނެ އިންވެސްޓްމަންޓަކަށް ވާނެކަމަށާއި އެހެންކަމުން އެއަރޕޯޓް މަޝްރޫޢުއަށް ވަރަށް އިސްކަންދެއްވާކަަމަށް ރައީސް މުއިއްޒު ވިދާޅުވިއެވެ.

ރައީސް ވިދާޅުވީ ސިއްޙީ ދާއިރާ ތަރައްޤީކޮށް ވަސީލަތްތައް އިތުރުކޮށް، ފުޓްބޯޅަ ދަނޑެއް ތަރައްޤީކޮށްދެއްވާނެކަމަށެވެ. އަދި ރަށައް ދިމާވެފައިވާ ބަނދަރުގެ ޖާގައިގެ ދަތިކަން ރައްޔިތުން އެދޭގޮތަށް ހައްލު ކުރަށްވާނެ ކަމަށް ރައީސް ވިދާޅުވިއެވެ.