ރާއްޖޭގެ ހުރިހާ އަތޮޅެއްގައި މިއަހަރު ޕަބްލިކް ވޯކްސްގެ ހިދުމަތް ފެށުމަށް ނިންމާފައިވާ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

ރ. އަތޮޅުގެ ރަށްތަކަށް ކުރައްވަމުން ގެންދަވާ ދަތުރުފުޅުގެ ތެރެއިން މާކުރަތު ރައްޔިތުންނާއެކު ބޭއްވި ޖަލްސާގައި ވާހަކަފުޅުދައްކަވަމުން ރައީސް ޑރ.މުޙައްމަދު މުޢިއްޒު ވިދާޅުވީ ކޮންމެ އަތޮޅެއްގައި ޕަބްލިކް ވޯކްސްގެ އެއް މަރުކަޒު ބެހެއްޓުމަކީ އެމަނިކުފާނު މެނިފެސްޓޯގައި ހިމެނޭ ކަމެއް ކަމަށެވެ. ރައީސް ވިދާޅުވީ މިހާރު ހުރި ޕަބްލިކް ވޯކްސް މަރުކަޒުތަކަކީ ވަރަށް ދުވަސްވެފައި ހުރި ތަންތަން ކަމަށެވެ. އަދި އެއްގޮތަކަށް ވެސް ޕަބްލިކް ވޯކްސް މަރުކަޒުތައް ނެތް އަތޮޅުތައް ވެސް އެބަހުރި ކަމަށް ރައީސް މުޢިއްޒު ވިދާޅުވިއެވެ.

މީގެ އިތުރުން ރައީސް ވިދާޅުވީ ސަރުކާރުން ގިނަ އިންފްރާސްޓްރަކްޗާ މަޝްރޫތައް ހިންގަނީ ވަރަށް ގިނަ ހަރަދުތައްކޮށްގެން ކަމަށެވެ. އެގޮތުން އެ ތަންތަން ރަނގަޅަށް ބެލެހެއްޓުމަކީ ވެސް މުހިއްމު ކަމެއް ކަން ފާހަގަކުރަށްވައި ރައީސް ވިދާޅުވީ މެއިންޓެނެންސް މަސައްކަތްތަކާއި ރަށްރަށުގައި ހުންނަ ކުދިކުދި މަސައްކަތްތައް ކުރުމުގައި ޕަބްލިކް ވޯކްސް ވަރަށް ބޮޑު ދައުރެއް އަދާކުރާ ކަމަށެވެ. ރާއްޖޭގެ އުތުރާއި ދެކުނުގައި ޕަބްލިކް ވޯކްސްގެ މޮބައިލް ދެ ޔުނިޓް ހަމަޖެއްސުމަށް ބަޖެޓުގެ ތެރެއިން ފައިސާ ހަމަޖައްސާފައިވާ ކަމަށް ރައީސް ވިދާޅުވި އެވެ.

ރައީސް އިތުރަށް ވިދާޅުވީ ޕަބްލިކް ވޯކްސް ސައިޓުތައް ހެދުމަކީ ބޭކާރުވެގެންދާނެ ހަރަދެއް ނޫން ކަމަށެެވެ. އަދި ޕަބްލިކް ވޯކްސް ނިޒާމު ގާއިމުކުރެވުމުން ކުރިއަށް އޮތް ތަނުގައި ރަށްރަށުގައި ހުންނަ އިންފްރާސްޓްރަކްޗާ ތަންތަން ބެލެހެއްޓުމަށް ކުރަންޖެހޭ ހަރަދުތައް ވަރަށް ބޮޑަށް ކުޑަވެގެންދާނެ ކަމަށް އެމަނިކުފާނު ވިދާޅުވިއެވެެ. ރައީސް ވިދާޅުވީ ރ.އަތޮޅުގައި ގާއިމް ކުރާ ޕަބްލިކް ވޯކް ސެންޓަރު އެޅުމަށް ހަމަޖެހިފައިވަނީ މާކުރަތުގައި ކަމަށެވެ.

"ހަމައެގޮތަށް ކޮންމެ އަތޮޅެއްގައި މިއަހަރު ޕަބްލިކް ވޯކްސް ސައިޓެއް ހެދިގެންދާނެ، ހުރިހާ މެނިޝަރީސް ތަކެތި ފުރިހަމަ ކުރެވިފައި ހުންނަ، މިއީ ވަރަށް ބޮޑު އިންވެސްޓްމަންޓެއް،" ރައީސް ވިދާޅުވިއެވެެ.