ޗައިނާއާއި ރާއްޖެއާ ދެމެދު ފަށާފައިވާ މޯލްޑިވިއަންގެ ދަތުރުތަކުން އަހަރަކު 40000 ފަތުރުވެރިން ރާއްޖެ ގެނެވޭނެ ކަމަށް ޓޫރިޒަމް މިނިސްޓަރު އިބްރާހިމް ފައިސަލް ވިދާޅުވެއްޖެއެވެ.

މޯލްޑިވިއަންގެ ޗައިނާ ދަތުރުތަކުގެތެރެއިން އެންމެ ފުރަތަމަ މަންޒިލަކީ ޗެންޑޫއެވެ. އެގޮތުން ޗެންޑޫއިން ރާއްޖެއަށް އައި ފުރަތަމަ ފްލައިޓުގައި ގިނަ އަދަދެއްގެ ފަތުރުވެރިން ވަނީ އައިސްފައެވެ.

ދައުލަތުގެ މީޑިޔާ ޕީއެސްއެމް އަށް ދެެއްވި އިންޓަވިއު އެއްގައި ޓޫރިޒަމް މިނިސްޓަރު އިބްރާހިމް ފައިސަލް ވިދާޅުވީ މިދަތުރުތަކުގެ ސަބަބުން ފަތުރުވެރިކަމަށް ކުރިއެރުންތަކެއް ލިބިގެންދާނެ ކަމަށެވެ. މިގޮތުން ޗައިނާ މާކެޓުން އެކަނިވެސް މިދަތުރުތަކާއެކު 40،000 ފަތުރުވެރިން އަންނާނެ ކަމަށް ފައިސަލް ވިދާޅުވިއެވެ. މިނިސްޓަރު ފައިސަލް ވިދާޅުވީމިދިޔަ އަހަރު އެކަނިވެސް ޗައިނާ މާކެޓުން 270،000 ވަރަކަށް ފަތުރުވެރިން ރާއްޖެ އައިސްފައިވާ ކަމަށެވެ.

"މޯލްޑިވިއަނުން ވިދާޅުވެފައިވަނީ މި ދަތުރުތަކާއިއެކު 40،000 ފަތުރުވެރިން އަހަރެއްގެ މައްޗަށް ގެނެވޭނެ ކަމަށް. މީގެ އިތުރުން ޔޫރަޕަށް ދަތުރު ފެށުމަށް އިތުރު ބޯޓެއް ގެންނަވާނެ ކަމަށް ރައީސުލްޖުމްހޫރިއްޔާ ވަނީ އިއުލާން ކުރައްވާފައި. މިއީ ފަތުރުވެރިކަން އިތުރު ހަރުފަތަކަށް ގެންދިއުމަށް، ލިބުނު ކުރިއެރުމެއް." މިނިސްޓަރު ފައިސަލް ވިދާޅުވިއެވެ.

މޯލްޑިވިއަންގެ ދަތުރުތައް ޗައިނާއަށް ފަށާފައިވާއިރު، ރާއްޖެއިން ޗައިނާގެ ޗެންޑޫއަށް ފުރަތަމަ ފްލައިޓު ފުރާފައިވަނީ، މިދިޔަ ބުދަ ދުވަހުއެވެ. ޗައިނާގެ ފުރަތަމަ ފްލައިޓް މިއަދު ހެނދުނު ރާއްޖެ އައިސްފައިވާއިރު، މިފްލައިޓުން ޖުމްލަ 192 މީހަކު ރާއްޖެ އައިސްފައިވެަެވެ. މީގެ ތެރެއިން 172 މީހުންނަކީ ފަތުރުވެރިން ކަމަށް މޯލްޑިވިއަނުން ވަނީ ބުނެފައެވެ.