ރައްޔިތުން އެދޭ ވެރިކަމެއް ކޮށްދިނުމަށާއި ނޫނީ ނަތީޖާ ހިތިވާނެ ކަމަށް ވިދާޅުވެ ރައްޔިތުންގެ މަޖިލީހުގެ ކުރީގެ މެމްބަރު އަދި އެމްޑީޕީގެ ކުރީގެ ޗެއަރޕަރސަން މާރިޔާ އަހުމަދު ދީދީ ރައީސް ޑރ.މުޙައްމަދު މުޢިއްޒަށް ވަރުގަދަ އިންޒާރެއް ދެއްވައިފިއެވެ.

އެމްޑީޕީގެ ރޭ ބޭއްވި ހަރުގެ ޖަލްސާގައި ވާހަކަ ދައްކަވަމުން އެމްޑީޕީގެ ކުރީގެ ޗެއަރޕަރސަން މާރިޔާ އަހުމަދު ދީދީ ވަނީ ރައްޔިތުންނަށް ވެވަޑައިގެންނެވި ވައުދުތައް ފުއްދެވުމަށް ރައީސް މުއިއްޒަށް ގޮވާލައްވާފައެވެ. އެގޮތުން ރައްޔިތުންނަށް އާސަންދަ ލިބޭގޮތް ހަދައިދީ ތެދުވެރިކަމާއެކު ވެެރިކަން ކޮށްދީ މަސްވެރިންނަށް މަސްކިރޭނެ ގޮތް ހަދައި ދިނުމަށް ރައީސްގެ އަރިހުން އެދިވަޑައިގަންނަވާ ކަމަށް މާރިޔާ ވިދާޅުވިއެވެ.

"ރައްޔިތުންގެ ފައިސާ އިން ޚަރަދުކުރާ ކަމަށް ވަންޏާ ރައްޔިތުންނާއި ވާހަކަ ދައްކައިގެން ރަނގަޅު ގޮތުގައި ކަންކަން ކޮށްދެއްވާށޭ، މިމަހު 31 ވަނަ ދުވަހު އަޅުގަނޑުމެން އެންމެން މި ނިކުންނަނީ މިއަޑު ރައީސް މުޢިއްޒަށް އިއްވަން ރައީސް މުޢިއްޒަށް ދަންނަވަން ނަސޭހަތް ލައިދެން މިހެންނޭ އަޑުތައް ހުރީ، ރައީސް މުޢިއްޒޭ ރައްޔިތުން އެދޭވެރިކަމެއް ރައްޔިިތުން އެދޭގޮތަށް ކޮށްދެއްވާށޭ އެހެން ނޫނިއްޔާ ނަތީޖާ ވަރަށް ހިތިވެގެން ހިގައިދާނެއޭ،" ކުރީގެ ޑިފެންސް މިނިސްޓަރު މާރިޔާ ވިދާޅުވިއެވެ.

މީގެ އިތުރުން މާރިޔާ ވިދާޅުވީ ރައީސް މުއިއްޒު ގެންދަވަނީ އިތުރުފުޅު ހައްދަވަމުން ކަމަށެވެ. އަދި އެމަނިކުފާނު ގެންދަވަނީ ރައްޔިތުން ނިކަމެތިކުރަމުން ކަމަށް މާރިޔާ ވިދާޅުވިއެވެ. ސަރުކާރަށް ވަރަށް ބޮޑަށް ފާޑު ވިދާޅުވެ ވާހަކަ ދައްކަވަމުން މާރިޔާ ވިދާޅުވީ ރާއްޖެ މިހާރު ދަނީ ނޯތު ކޮރެޔާ އަށް ބަދަލުވަމުން ކަމަށެވެ.

މާރިޔާ ވިދާޅުވީ ރައްޔިތުން އެދެނީ ސަރުކާރު ބަދަލުކުރަން ކަމަށެވެ. އަދި މަގުމަތިން އިވޭހާވެސް އަޑަކީ އެއީ ކަމަށް މާރިޔާ ވިދާޅުވިއެވެ.