ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރާއްޖެއަށް ގެންނަވަން ބޭނުންފުޅުވާ ތަރައްގީގައި ފުލުހުންގެ ފުޅާ ދައުރެއް އެބައޮތް ކަމަށް ދިފާޢީ ވަޒީރު މުޙައްމަދު ޣައްސާން މައުމޫން މިރޭ ވިދާޅުވެއްޖެއެވެ.

ޣައްސާން މިހެން ވިދާޅުވީ ފުލުހުންގެ 38 ވަނަ އަސާސީ ތަމްރީން ކޯހުގެ ދަސްވެނިވުމުގެ ރަސްމިއްޔާތު ޝަރަފުވެރިކޮށްދެއްވައި ވާހަކަފުޅު ދައްކަވަމުންނެވެ.

ދ. ވާނީ ކެމްޕަސްގައި މިރޭ ބޭއްވި މި ރަސްމިއްޔާތުގައި ދިފާޢީ ވަޒީރު މުޙައްމަދު ޣައްސާން މައުމޫން ވިދާޅުވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމުގެ ހުވާކުރެއްވީ ދިވެހި ރައްޔިތުން ހަވާލުކުރެއްވި މުހިންމު ޒިންމާތަކެއް އުފުއްލަވައިގެން ރައްޔިތުންނާއި މުޖުތަމަޢު ރައްކާތެރިކުރައްވަން ކަމަށެވެ. އަދި މިނިވަންކަމާއި އިސްތިގުލާލު ދަމަހައްޓަވައި، އިގްތިސާދީގޮތުން ފުދުންތެރި ޤައުމަކަށް ހެއްދެވުމުގެ މަސައްކަތް ޒިންމާދާރުކަމާއެކު އެމަނިކުފާނު ކުރައްވަމުން ގެންދަވާ ކަން ޣައްސާން ފާހަގަކުރެއްވިއެވެ. އެގޮތުން އިގްތިސާދީ ގޮތުން ފުދުންތެރިކަން ހޯދުންވިޔަސް އިޖުތިމާޢީ ފޭރާން ހަރުދަނާކުރުން ކަމަށް ވިޔަސް އެހުރިހާ މަސައްކަތްތަކެއްގެ ހަގީގި އެއް މޭސްތިރިންނަށްވާނީ އަބަދުވެސް ދިވެހި ފުލުހުން ކަމަށް ޣައްސާން ވިދާޅުވިއެވެ.

"ތިބޭފުޅުންގެ މަސައްކަތްޕުޅުން ދިވެހިރާއްޖެއަކީ ސުލްހަމަސަލަސްކަން ދެމި އޮންނަ އަމަންއަމާން ވެއްޓެއް ޤާއިމުވެފައި އޮންނަ ޤައުމަކަށް ހެއްދެވުމަކީ ދިވެހި މުސްތަގުބަލް އުޖާލާވެގެންދާނެ މަގު،" ދިފާޢީ ވަޒީރު ޣައްސާން ވިދާޅުވިއެވެ.