ޓްރާންސްފޯމަރަކުން ވައްކަން ކުރަން އުޅުނު މީހަކު އަނެއްކާވެސް އަތުލައިގެންފި އެވެ.

ސްޓެލްކޯއިން މިއަދު އެކްސްގައި ބުނީ ރޭ ދަންވަރު 2:50 ގައި މާފަންނު މަދުރަސާ ސަރަހައްދުގައި ހުރި އެ ކުންފުނީގެ ޓްރާންސްފޯމަރ ސަބްސްޓޭޝަނަށްވަދެ ވައްކަމުގެ އަމަލެއް ހިންގަން އުޅުނު މީހަކު ސީސީޓީވީ ކެމެރާއިން ފެނިގެން ފުލުހުންނަށް ރިޕޯޓްކޮށްފައިވާ ކަމަށެވެ.

އަދި އެ ރިޕޯޓާ ގުޅިގެން ވައްކަންކުރަން އުޅުނު މީހާ ހައްޔަރުކޮށްފައިވާ ކަމަށް ވެސް ސްޓެލްކޯއިން ބުނެފައި ވެއެވެ.

ސްޓެލްކޯއިން ބުނީ ޓްރާންސްފޯމަރުތައް ހުންނަ ސްޓެލްކޯގެ މާލޭގެ ސަބްސްޓޭޝަންތަކަކީ 24 ގަޑިއިރު ކެމެރާއިން މޮނިޓަރ ކުރެވޭ ތަންތަން ކަމަށެވެ.

ނަމަވެސް، ހުޅުމާލޭގެ ދެވަނަ ފިޔަވަހީގެ ސަބްސްޓޭޝަންފަދަ ތަންތަނުގައި އަދި ކެމެރާ ނުހުންނާތީ އެ ތަންތަނުން ކުރެވޭ އެފަދަ ވައްކަންތައް ހުއްޓުވުމަށް އާންމު ރައްޔިތުންގެ އެހީތެރިކަން ބޭނުންވާކަމަށް ވެސް ސްޓެލްކޯއިން ބުނެފައި ވެއެވެ.

"މިފަދަ އަމަލުތައް ހިންގާ ފަރާތްތަކުން، އެކަމަކީ އެމީހުންގެ ފުރާނައަށް ނުރައްކާވެދާނެ ކަމެއްކަން ދެނެގަނެ، އެފަދަ އަމަލުތަކުން ދުރުހެލިވުމަށް އިލްތިމާސްކުރަން. އަދި ރައްޔިތުންނަށް ދަތިތަކެއް ކުރިމަތިވާ މިފަދަ ވައްކަންތަކުން ހޯދާ ތަކެތި ވިއްކާ އަދި ގަންނަ ފަރާތްތައްވެސް ހޯދައި، ގާނޫނީ ފިޔަވަޅު އެޅުމަށް ކަމާބެހޭ އިދާރާތަކަށް އިލްތިމާސްކުރަން." ސްޓެލްކޯއިން ބުނެފައި ވެއެވެ.

މި މަހު އެކަނިވެސް ޖުމްލަ ތިން ފަހަރު ސްޓެލްކޯގެ ޓްރާންސްފޯމަރުން ވައްކަންކުރަން އެ ތަންތަނަށް ގެއްލުން ދީފައިވެއެވެ. އެ ތަނުން ވައްކަން ކުރަން އުޅުނު މީހަކު މިދިޔަ އަހަރު މަރުވެސް ވިއެވެ.