ގަޟާ ގަދަރަށް ފުރިހަމައަށް އީމާންނުވާނަމަ އީމާންކަން ފުރިހަމަ ނުވާނެކަމަށް މިއަދުގެ ހުތުބާގައި ބުނެފި އެވެ.

މިއަދުގެ ހުތުބާގައި ވަނީ އީމާންކަމުގެ ރުކުންތަކުގެ ތެރެއިން ގަޟާ ގަދަރަށް އީމާންވުމުގެ މުހިންމުކަން ފާހަގަކޮށްފަ އެވެ.

އީމާންކަމުގެ ރުކުންތަކުގެ ތެރޭގައި ﷲއަށާއި މަލާއިކަތުންނަށާއި ބާވާލެއްވި ފޮތްތަކަށާއި ރަސޫލުންނަށާއި އަދި ގިޔާމަތް ދުވަހަށް އީމާންވުން ހިމެނެ އެވެ.

އަދި ގަޟާ ގަދަރަށް އީމާންވުމަކީ އީމާންކަމުގެ ރުކުންތަކުގެ ތެރެއިން ހަވަނަ ރުކުންކަން މިއަދުގެ ހުތުބާގައި ފާހަގަކޮށްފައި ވެއެވެ.

"ގަޟާ ގަދަރަށް ފުރިހަމައަށް އީމާންނުވާ ނަމަ، އޭނާގެ އީމާންކަން ފުރިހަމަ ނުވާނެ. އީމާންކަމުގެ ރުކުންތަކުގެ ތެރެއިން ރުކުނަކަށް އިންކާރުކޮށްފި މީހާ އީމާންވި ކަމުގައެއް ނުވެއެވެ." ހުތުބާގައި ބުނެފައި ވެއެވެ.

ހުތުބާގައި ބުނީ ގަޟާ ގަދަރަށް އީމާންވާ މީހަކު އޭނާގެ ހަޔާތް ހޭދަކުރަމުންދާނީ ހިތްހަމަޖެހުމާ އެކުގައި ކަމަށެވެ. އަދި ފިތުނައިގެ ސަބަބުން އެ ފަދަ މީހަކު ގުޑުގުޑުއަޅައިގެން ނުދާނެކަމަށް ވެސް ހުތުބާގައި ބުނެފައިވެ އެވެ.

އޭގެ އިތުރުން ގަޟާ ގަދަރަށް އިމާންވާ މީހާ ދަތި އުނދަގޫކަމެއް ދިމާވުމުން އެފަދަ މީހަކު ބަލިކަށިވެގެން ވެސް ނުދާނެކަން ހުތުބާގައި ފާހަގަކޮށްފައި ވެއެވެ.

"ހުރިހާ ކަމެއް މެދުވެރިވެގެންދަނީ މާތް اللهގެ އިލްމުފުޅާއި އެކަލާނގެ އިރާދަފުޅުންކަން އިއުތިގާދުކުރާ ބަޔަކު ބިރުގަނެ، ހިތްނުތަނަވަސްވެ، މާޔޫސްވާކަށް ނުޖެހޭނެއެވެ." ހުތުބާގައި ބުނެފައި ވެއެވެ.