މަސައްކަތް މި ކުރައްވަނީ ޕީޖީ އޮފީހަކީ ޤާނޫނާ އެއްގޮތަށް އަމަލުކުރާ މުއައްސަސާއަކަށް ހެދުމަށް ކަމުގައި ޕްރޮސެކިއުޓަރ ޖެނެރަލް ޙުސައިން ޝަމީމް ވިދާޅުވެއްޖެއެވެ.

ޕީޖީ އޮފީހަށް 12 އަހަރު ފުރުމާއި ދިމާކޮށް މިއަދު ކުރެއްވި ޓްވީޓެއްގައި ޕީޖީ ޝަމީމް ވިދާޅުވީ، އޭނާ މަސައްކަތް ކުރައްވަނީ (އޭނާ ނެތަސް) ޕީޖީ އޮފީހަކީ އަބަދުވެސް، ހަމަ ހުރިހާ ހާލަތެއްގައިވެސް، ޤާނޫނާ އެއްގޮތަށް އަމަލު ކުރާ، އިތުބާރާއެކު ދުނިޔޭގެ ފެންވަރުގައި ޚިދުމަތްދޭ، ދުޅަހެޔޮ މުވައްޒަފުންތަކެއް މަސައްކަތް ކުރާ މުއައްސަސާއެއްގެ ގޮތުގައި، ދެމެހެއްޓޭތޯ ކަމަށެވެ.

@PGO_MV 12th anniversary. I remember opening the office briefly for @AhmedMuizzu as the only staff on 4th Sep 2008. Thank you sir for steering the institution from the beginning (and continuous advise since then) and now we shall push for even higher standards. 🙏🏽 pic.twitter.com/U717tb8jNP

— Hussain Shameem (@HuShameem) September 4, 2020

ޕްރޮސެކިއުޓަރ ޖެނެރަލްގެ މަޤާމަށް އަލްއުސްތާޛު ޙުސައިން ޝަމީމް އައްޔަން ކުރައްވާފައި ވަނީ 08 ޑިސެންބަރު 2019 ގައެވެ. އޭގެ ކުރިން 04 ފެބުރުއަރީ 2009 ގައި ޝަމީމް ވަނީ ޑެޕިއުޓީ ޕްރޮސެކިއުޓަރ ޖެނެރަލްގެ މަޤާމަށްވެސް އައްޔަން ކުރައްވާފައެވެ. އޭގެ ފަހުން ދެވަނަ ފަހަރަށް 12 ނޮވެމްބަރު 2013 ގައިވެސް ޝަމީމު ވަނީ ޑެޕިއުޓީ ޕްރޮސެކިއުޓަރ ޖެނެރަލްގެ މަޤާމަށް އައްޔަން ކުރައްވާފައެވެ.

ފެހި ޤާނޫނުއަސާސީގެ ދަށުން އުފެއްދި ޕީޖީ އޮފީހަށް އެންމެ ފުރަތަމަ އައްޔަނު ކުރެއްވި ޕްރޮސިކިއުޓާ ޖެނެރަލަކީ އަލްއުސްތާޛު އަހުމަދު މުއިއްޒު އެވެ. ހަތަރެއް ސެޕްޓެމްބަރު 2008 އިން 25 ނޮވެންބަރު 2013 ގެ ނިޔަލަށް މުއިއްޒު ވަނީ ޕީޖީގެ މަގާމު ފުރުއްވާފައެވެ. އޭގެ ފަހުން ޕީޖީގެ މަގާމް ފުރުއްވާފައިވަނީ އަލްއުސްތާޛު މުހުތާޒް މުހުސިންއެވެ. އަދި އޭގެފަހުން ޕީޖީ އަކަށް ހުންނެވީ އަލްއުސްތާޛާ އައިޝަތް ބިޝާމެވެ. ޕީޖީ ހުސައިން ޝަމީމަކީ ފެހި ޤާނޫނުއަސާސީގެ ދަށުން އައްޔަނު ކުރެވުނު ހަތަރު ވަނަ ޕްރޮސެކިއުޓަރ ޖެނެރަލް އެވެ.

ޕީޖީ ޝަމީމް ވަނީ ޕީޖީ އޮފީހުގެ 12 ވަނަ އަހަރީ ދުވަހުގެ ތަޙުނިޔާއާއި މުބާރިކްބާދީ އެ އޮފީހުގައި މަސައްކަތް ކުރައްވާފައިވާ ކުރީގެ މުވައްޒަަފުންނަށާއި، މިހާރު މަސައްކަތް ކުރައްވާ މުވައްޒަފުންނަށްވެސް އަރިސް ކުރައްވާފައެވެ.