ސްރީ ލަންކާ ސަރަހައްދުގެ ކަނޑުމަތީގައި ރޯވި ތެޔޮ ޓޭންކަަރުގައި ހުރި ތެޔޮތައް ކަނޑަށް އެޅި އެތެލުގެ އަސަރު ރާއްޖެ އަށް ކުރާނެ ކަމަށް ނުބެލެވޭ ކަމަށާއި އެހެން ނަމަވެސް ރައްކާތެރިކަމުގެ ފިޔަވަޅުތައް އަޅަން ފަށާފައިވާ ކަމަށް ދިވެހި ސަރުކާރުން ބުނެފިއެވެ.

އެންވަޔަރަމެންޓް މިނިސްޓްރީގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެމްއެންޑީއެފް ކޯސްޓް ގާޑްގެ ކޮމަޑާންޓް ކާނަލް މުހައްމަދު ސަލީމް ވިދާޅުވީ، ތެޔޮ ޓޭންކަރު ހާދިސާއާއި ގުޅިގެން ރައްކާތެރި ކަމުގެ ފިޔަވަޅުތައް އަޅަން ފަށާފައިވާ ކަމަށާއި، އެކަމާ ގުޅިގެން ޓާސްފޯސް އެއްވެސް އެކުލަވާލައިފައިވާ ކަމަށެވެ. ތެޔޮ ޓޭންކަރު ހާދިސާއާއި ގުޅިގެން ސްރީލަންކާ ސަރުކާރާއި ދިވެހި ސަރުކާރުން ވަރަށް ކައިރިން މަޝްވަރާ ކުރަމުން އަންނަ ކަމަށާއި އަދި އެ ޓޭންކަރުން ތެޔޮ ލީކު ނުވާކަމަށް މައުލޫމާތު ލިބިފައިވާ ކަމަށް ސަލީމް ވިދާޅުވިއެވެ.

އޭނާ ވިދާޅުވީ ވަރަށް ކައިރިން ތެޔޮ ޓޭންކަރުގައި ރޯވި ހާދިސާގެ ކަންކަން ބަލަން ޖެހޭ ކަމަށާއި މީގެ ސަބަބުން އިތުރު ބަދަލެއް އަންނަ ކަމަށް ވާނަމަ، އަޅަން ޖެހޭ ފިޔަވަޅުތައް އެޅުމަށް ދިވެހި ސަރުކާރުން ތައްޔާރުވެފައިވާ ކަމަށެވެ.

" ހޫނު ގަދަވެގެން ގޮސް އިތުރަށް ގޯސްވާނަމަ ތެޔޮ ލީކުވުމުގެ ފުރުސަތުވެސް އޮންނާނެ، އަޅުގަނޑުމެންނަށް ލިބޭ މައުލޫމާތައް ބަލާއިރު ތެޔޮ ލީކުވުމުގެ ފުރުސަތު ކުޑަ ކަމަށް ސްރީލަންކާގެ ކަމާބެހޭ ފަރާތްތަކުން މައުލޫމާތުދެނީ. އެފުރުސަތު ކުޑަ އަދި ރާއްޖެއަށް މިކަމުގެ ނުރައްކަލެއް އޮތް ކަމަކަށް އަޅުގަނޑުމެންނަށް ފާހަގައެއް ނުކުރެވޭ. މިހާތަނަށް އެއްވެސް ގެއްލުމެއް ރާއްޖެއަށް އަންނާނެ ކަމަށް ފާހަގައެއް ނުކުރެވޭ." ސަލީމް ވިދާޅުވިއެވެ.

މިރީޖަންގައި މިފަދަ ހާދިސާއެއް ހިނގައިފާނެ ކަމަށް ބަލައި ކުރީއްސުރެ އެކި ކަހަލަ މަސައްކަތްތައް ކޮށްފައިވާ ކަން ސަލީމް ފާހަގަކުރެއްވިއެވެ. އަލިފާނުގެ ހާދިސާ ހިނގި ތެޔޮ ބޯޓު އޮތީ ތިލަތަނެއްގައި ނޫން ކަމަށާއި އެހެން ކަމުން ތެޔޮ ލީކުވުމުގެ ފުރުސަތު ކުޑަ ކަމަށް އޭނާ ވިދާޅުވިއެވެ. އަދި މޫސުމަށް ބަލާއިރު އޮޔާއި ވައި ހުރިގޮތުން މިހާރު އެ ބޯޓު ދަތުރުކުރަމުން ދަނީ ރާއްޖެއާއި ދުރަށް ކަމުން ރާއްޖޭގެ ފަރަށާއި ކަނޑުގެ ދިރުންތަކަށް ގެއްލުންވުމުގެ ފުރުސަތު ކުޑަކަމަށް ސަލީމް ވިދާޅުވިއެވެ.

އޭނާ ވިދާޅުވީ ލޯކަލް ލެވެލްގައި ތެޔޮ ލީކުވުމުގެ ހާދިސާއެއް ކޮންޓްރޯލު ކުރުމަށް ބޭނުންވާ ބައެއް ސާމާނު ޖަޕާނު ސަރުކާރުން ހަދިޔާކޮށްފައިވާ ކަމަށެވެ. އަދި އެކަމުން ރައްކާތެރި ވުމަށް ބޭނުންވާ ވަސީލަތްތައް އެބަހުރި ކަމަށް އޭނާ ވިދާޅުވިއެެވެ. ތެޔޮ ލީކުވެއްޖެއްޔާ ކަނޑުން ތެޔޮ ނަގާނެ ވަސީލަތްތަކާއި، ޓޭންކުތަކަށް އަަޅައިގެން އެއް ތަނުން އަނެއް ތަނަށް ގެންދިޔުމަށް ބޭނުންވާ ވަސީލަތްތަކާއި، ވަކި ސަރަހައްދަކަށް ތެޔޮ ދިޔަ ނުދީ ހިފަހައްޓަން ބޭނުންވާ ސާމާނު ވެސް އެބަހުރި ކަމަށް ސަލީމް ވިދާޅުވިއެވެ.

މެޓް އޮފީހުގެ ފަރާތުން ވާހަކަ ދެއްކެވި އޮފިޝަލަކު ވެސް ވިދާޅުވީ މި ދުވަސްވަރުގެ އޮއިވަރާއި ވަޔަށް ބަލާއިރު، ތެޔޮ ލީކުވިޔަސް ރާއްޖެއަށް ތެޔޮ ފޯރާނެ ކަމަށް ނުބެލެވޭ ކަމަށެވެ. "ރާއްޖޭއާ ގާތަށް އޮއިލް ސްޕިލްއެއްގެ ޑައިރެކްޓް އިމްޕެކްޓު ކުރުމުގެ ފުރުސަތު ވަރަށް ކުޑަ. މިހާރު މޫސުން ކުރިއަށް ލަފާ ކުރާ ގޮތުން." އޮފިޝަލު ވިދާޅުވިއެވެ.