މާލޭގެ ގިނަ މަގުތަކުގެ ކާނުތައް ސާފުކޮށް ނިމިފައިވާކަން ލޯކަލް ގަވަމެންޓް މިނިސްޓްރީން ހާމަކޮށްފިއެވެ.

މިނިސްޓްރީން އެކްސްގައި ކުރި ޕޯސްޓެއްގައި ބުނެފައިވަނީ މާލޭގެ މަގުތަކުގެ ކާނުތައް ސާފުކުރުމަށް ކުރަމުންދާ މަސައްކަތުގެ ތެރެއިން އޮލިމްޕަހުން ފެށިގެން ރަސްފަންނާ ހަމައަށް މަޖީދީމަގުގެ ދެފަޅީގައިވާ ކާނުތައް ސާފުކޮށް ނިންމާލާފައި ވާކަމަށެވެ.

އަދި މިއަދުން ފެށިގެން ކުރިއަށްދާނީ މަޖީދީމަގުގެ އޮލިމްޕަހުން ފެށިގެން ހެންވޭރާ ދިމާއަށް ހުރި ކާނުތައް ސާފު ކުރުމުގެ މަސައްކަތް ކަމަށް މިނިސްޓްރީން ވަނީ ބުނެފައެވެ.

ރަމަޟާންމަހު މި މަސައްކަތް ކުރަނީ ކޮންމެ ދުވަހެއްގެ ހެނދުނު 9.00 އިން މެންދުރު ފަހު 2.00 އަށެވެ.

މާލޭގެ ކާނުތައް ސާފުކުރުމަށް މިނިސްޓްރީން ކުރަމުންދާ މަސައްކަތުން، މަޖީދީމަގުގެ ދެފަޅީގައިވާ ކާނުތައް އޮލިމްޕަހުން ފެށިގެން ހުޅަނގަށް، ރަސްފަންނާ ހަމައަށް ސާފުކޮށް ނިންމާލައިފި. pic.twitter.com/LChXKqwTly

— Ministry of Cities, Local Government, Public Works (@MoCLPmv) March 21, 2025

ވާރޭވެހި ފެންބޮޑުވުމުގެ ސަބަބުން މާލޭގައި ދިރިއުޅޭ ފަރާތްތަކަށް ދިމާވާ އުނދަގޫތައް ކުޑަކުރުމުގެ ގޮތުން މާލޭގެ މަގުތަކުގައި ހަދާފައިވާ ކާނުތައް ސާފުކުރުމުގެ މަސައްކަތް ފަށާފައިވަނީ މިމަހު 8 ވަނަ ދުވަހުއެވެ.

މި މަސައްކަތް ނިމޭއިރު މާލޭގައި ފެންބޮޑުވާ މައްސަލައަށް ކޮންމެވެސްވަރެއްގެ ހައްލެއް ލިބޭނެ ކަމަށް މިނިސްޓްރީން ވަނީ މީގެ ކުރިން ބުނެފައެވެ.

އަދި މި މަސައްކަތް 6 މަސް ދުވަސްތެރޭ ނިންމާލެވޭނެ ކަމަށްވެސް މިނިސްޓްރީން ބުނެފައި ވެއެވެ.