އެމެރިކާގެ ބޯޓުތަކަށް ބަޑިޖެހުން ހުއްޓާލައިފިނަމަ ހޫޘީންނަށް ދޭ ހަމަލާތައް ހުއްޓާލާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ބުނެފިއެވެ.

ރައީސް ޑޮނަލްޑް ޓްރަމްޕް ހޯމަ ދުވަހު ބުނީ ޔަމަނުގެ އެންމެ އާބާދީ ބޮޑު ސަރަހައްދުތަކުގެ ކޮންޓްރޯލް ހޯދާފައިވާ ހަތިޔާރު އެޅި ޖަމާއަތް، ހޫޘީންނަށް ދެމުންގެންދާ ހަމަލާތައް ހުއްޓާލާނެ ކަމަށެވެ. މި ހަމަލާތައް ހުއްޓާލާނީ އެމެރިކާގެ ބޯޓުތަކަށް މިނިވަންކަމާއެކު ދަތުރުކުރުމުގެ ފުރުސަތު ލިބިގެން ކަމަށް އޭނާ ބުންޏެވެ.

އީރާނުގެ ތާއީދު އޮންނަ ހޫޘީންނަކީ މިހާރު އެމެރިކާއަށް އެންމެ ނުރައްކާ ބޮޑު އެއް ޖަމާއަތެވެ. މީގެ އެއް ސަބަބަކީ ހޫޘީން ރަތްކަނޑުގެ ބައެއް ކޮންޓްރޯލް ކުރާތީ އޭގެ ނުރައްކާ އެ ކަނޑު ހުރަސްކުރާ ބޯޓު ތަކަށް އޮތުމުންނެވެ. ހޫޘީން ބުނާ ގޮތުގައި ފަލަސްތީނާ ދެކޮޅަށް ނުކުންނަށް ކޮންމެ ބަޔަކަށްވެސް ނުވަތަ އިދިކޮޅު ކޮންމެ ފަރާތެއްގެ ބޯޓެއް ރަތް ކަނޑުން ދަތުރުކުރި ނަމަވެސް ހަމަލާދޭނެ ކަމަށެވެ.

"ހޫޘީންނަށް ޗޮއިސް ސާފު: އެމެރިކާގެ ބޯޓުތަކަށް ބަޑިޖެހުން ހުއްޓާލާ، އަދި އަހަރެމެން ކަލޭމެންނަށް ބަޑިޖެހުން ހުއްޓާލާނަން. އެހެން ނޫންނަމަ އަހަރެމެން މި ފެށީ، އަދި ހަގީގީ ވޭން އަދި އަންނަން އޮތީ، ހޫޘީންނާއި އީރާނުގައި ތިބި އެމީހުންގެ ސްޕޮންސަރުންނަށް ވެސް،" ޓްރަމްޕް މީސްމީޑިއާ ޕޯސްޓެއްގައި ބުންޏެވެ.

ހޫޘީންގެ ހަމަލާތަކުގައި މިހާތަނަށް ރަތްކަނޑު ހުރަސްކުރި އެމެރިކާގެ ގިނަ ބޯޓުތަކެއް ވަނީ ފައްތާލާފައެވެ. މިއީ ދުނިޔޭގެ އެންމެ ވަރުގަދަ ބާރު ކަމަށް ދައުވާކުރަމުންދާ އެމެރިކާއަށް ލިބިގެންދިޔަ ވަރަށް ބޮޑު ހިތްދަތި ކަމެކެވެ. އަދިވެސް ހޫޘީންގެ އިންޒާރުތައް ވަރުގަދަކޮށް އޮތް އިރު ރައީސް ޓްރަމްޕް ގަދަބަސް ބުނަމުންދާތީ ބައެއް ފަރާތްތަކުން ދަނީ ކަންބޮޑުވުންތައް ފާޅުކުރަމުން ކަން ފާހަގަ ކުރެވެއެވެ.