އައްޑޫ ސިޓީގެ ގުޅިފައިވާ ރައްތަކުގައި ކަރަންޓް ކެނޑޭ މައްސަލަ ހައްލު ކުރަން އެންމެ ފަހުން ގެނައި 1.8 މެގަވޮޓްގެ ޖަނަރޭޓަރު ބޭނުން ކުރަން ފެށުމުންވެސް ކަރަންޓުގެ މައްސަލައަށް ހައްލެއް ނުގެނެވި ކަރަންޓު ކެނޑެން ފަށައިފިއެވެ.

އެ ސިޓީއަށް ކަރަންޓުގެ ހިދުމަތް ފޯރުކޮށްދެމުންދާ ފެނަކައިން އެންމެ ފަހުން ގެނައި ޖެނެރޭޓަރު އިންސްޓޯލް ކުރިތާ މިއަދަށް އަދި ވީ އެންމެ ދެ ދުވަހެވެ. ނަމަވެސް ކަރަންޓުގެ މައްސަލައަށް ހައްލެއް ނުގެނެވި އަނެއްކާ ވެސް ކަރަންޓް ކަނޑަން ވަނީ ފަށައިފަ އެވެ.

ފެނަކައިން މީގެ ކުރިން ބުނީ އާ ޖެނެރޭޓަރު ގެނައުމުން އައްޑޫގެ ކަރަންޓުގެ މައްސަލަ ހައްލުވާނެ ކަމަށެވެ. ނަމަވެސް ހިތަދޫ އާއި މަރަދޫ އާއި މަރަދޫފޭދޫގެ އިތުރުން ފޭދޫގެ އެކި ސަރަހައްދުތަކުން ގަޑިއެއްހާ އިރަށް މިއަދު ވަނީ ކަރަންޓް ކަނޑަން ފަށައިފަ އެވެ.

ކަރަންޓު ކަނޑަމުންދާތީ ވަރަށް ގިނަ ބަޔަކު މިހާރު އަންނަނީ މީސް މީޑިއާގައި ކަންބޮޑުވުން ފާޅުކުރަމުންނެވެ. އެގޮތުން ބައެއް މީހުން ބުނެފައި ވަނީ މުޅިން އާ އެއްޗެއް ކަމަށް ބުނެ އައްޑު އަށް އެންމެ ފަހުން ގެނައީ ބާވެފައިވާ ޖަނަރޭޓަރެއް ކަމަށް ބުނެ ދެކެވޭ ވާހަކަތަކަށް މިކަމުން ބާރު ލިބޭ ކަމަށެވެ. އަދި ފެނަކައިން އައްޑޫ ރައްޔިތުންނަށް ޖެއްސުން ކުރަމުންދާ ކަމަށް ބުނެފައިވެ އެވެ.

ރާއްޖޭގެ ދެވަނައަށް އެންމެ ބޮޑު އާބާދީއެއް ދިރިއުޅެމުންދާ އައްޑޫ ސިޓީން ކަރަންޓް ކެނޑޭ މައްސަލަ ހައްލު ކުރަން ފާއިތުވި ދެ މަހެއްހާ ދުވަހުގެ ތެރޭގައި ހަތަރު ޖަނަރޭޓަު ވަނީ ގެނެސްފައެވެ. އެއާއެކު ގުޅިފައިވާ އަވަށްތަކަށް ކަރަންޓް ފޯރުކޮށްދޭ މަރުކަޒީ އިންޖީނުގޭގައި މިހާރު ހުރި ޖަނަރޭޓަރުތަކުގެ އަދަދު 19 އަށް އަރަ އެވެ. ނަމަވެސް އެ އެއްޗެހީގެ ހާލަތު ދަށްކަމުން ބޭނުންވާ ވަރަކަށް ކަރަންޓެއް ނުއުފެއްދެ އެވެ.

ފެނަކަ އިން ބުނީ އައްޑޫގެ ޕީކް ގަޑިތަކުގައި ކަރަންޓު ލޯޑު 11.6 މެގަވޮޓަށް އަރާ ކަމަށެވެ.