އިސްރާއީލް ފަލަސްތީން ހަނގުރާމަގައި އަސްކަރީ އޮޕަރޭޝަން ފުޅާވަމުންދާއިރު އިސްރާއީލުން އަނެއްކާވެސް ޣައްޒާގެ ބައެއް ހިސާބުތައް ހިފަން ނިންމައިފިއެވެ.

މެދުއިރުމަތީގައި ހަމަނުޖެހުން ހިންގަމުންދާ އިސްރާއީލުން ޣައްޒާގައި އަސްކަރީ އޮޕަރޭޝަންތައް ބޮޑުތަނުން ފުޅާކުރާނެކަން އިއުލާންކޮށްފައި ވަނީ ބުދަ ދުވަހު އެވެ. އިސްރާއީލުން ބުނީ ޣައްޒާގެ ބޮޑެތި ސަރަހައްދުތައް އަތުލައިގަނެ ހަތިޔާރުއެޅި ސިފައިންގެ އެހީގައި ސަލާމަތީގޮތުން ރައްކާތެރި ސަރަހައްދުތަކަށް އެތަންތަން ހަދާނެ ކަމަށެވެ.

ބޮޑުވަޒީރު ބެންޖަމިން ނަތަންޔާހޫ ބުނީ އޭނާގެ ސިފައިން ފުރަތަމަ އަރައިގަންނާނީ މިޙްވަރް މޫރާޖަށް ކަމަށެވެ. މީގެ ކުރިންވެސް އިސްރާއީލުން މިތަނަށް ގަވާއިދާ ހިލާފަށް ވަދެ މިތަނުގައި ވަޒަންވެރިވިއެވެ. މިތަން އޮންނަނީ ޣައްޒާގެ ދެކުނުން ހަތަރު ކިލޯމީޓަރު ދުރުން ރަފާހާއި ޚާން ޔޫނިސް ސިޓީގެ މެދުގައެވެ.

ނަތަންޔާހޫ ބުނީ ފަލަސްތީނުގެ ބިންތަކަށް އެރުން ހުއްޓާލާނީ އިސްރާއީލުގެ އަސީރުން މިނިވަން ކުރުމުން ކަމަށެވެ. އަދި މިފަހަރުގެ މަސައްކަތުން ޣައްޒާއަށް ހަތިޔާރު އެތެރެކުރާ ދޮރުތައްވެސް ބަންދުވާނެ ކަމަށް އޭނާ ބުންޏެވެ.

ހަނގުރާމައިގެ އަސީރުން މިނިވަންކުރުމަށް ކަމަށް ބުނެ އިސްރާއީލުން ޣައްޒާއަށް އަރައި ލާއިންސާނީ ޖަރީމާތައް ހިންގަމުންދާއިރު އެންމެ ފަހުން ހެދި ހަނގުރާމަ ހުއްޓާލުމުގެ އެއްބަސްވުމާވެސް ހިލާފުވީ އިސްރާއީލުންކަން ފާހަގަ ކުރެވެއެވެ. އެގޮތުން މިސްރުން އިސްނަގައިގެން ފިޔަވަހިތަކަކަށް ބަހާލައިގެން މި ހަނގުރާމަ ހުއްޓާލުމަށް ހެދި އެއްބަސްވުން އިސްރާއީލުން މެދުކަނޑާލައި ވަނީ އަނެއްކާވެސް ޣައްޒާގެ އަންހެނުންނާއި ކުޑަކުދިން މަރަން ނިކުމެފައެވެ.

ޣައްޒާގެ ހެލްތު މިނިސްޓްރީން ބުނީ ބުދަ ދުވަހު އިސްރާއީލުން ދިން ހަމަލާތަކުގައި އެކަނިވެސް މަދުވެގެން 60 މީހުން މަރުވެފައިވާކަމަށެވެ.