ރައްޔިތުންގެ އަމިއްލަ ހިޔާރުތަކަށް ސަރުކާރުން އަތްގަދަ ކުރަމުންދާތީ ކަންބޮޑުވާކަމަށް އެމްޑީޕީގެ ޗެއާޕާސަން ފައްޔާޒު އިސްމާއިލް ވިދާޅުވެއްޖެއެވެ.

ފައްޔާޒު މިހެން ވިދާޅުވެފައިވަނީ ރާއްޖޭގައި ދުންފަތުގެ އިސްތިއުމާލު ކުރުން ހުއްޓުވުގެ ގޮތުން ސަރުކާރުން ކުރަމުންދާ މަސައްކަތާ ގުޅޭ ގޮތުން އެކްސްގައި ހިއްސާ ކުރެއްވި ޕޯސްޓެއްގައެވެ.

އެގޮތުން ފައްޔާޒު ވިދާޅުވީ ސަރުކާރުގެ ދައުރަކީ ރައްޔިތުންގެ ހޭލުންތެރިކަން އިތުރުކޮށް، ޅަފުރައިގެ މީހުންނާއި ދޮށީ އުމުރުގެ މީހުން ވެސް ދުންފަތުގެ އިސްތިއުމާލު ކުރުން ހުއްޓާލުމަށް ނުވަތަ ފެށުމުން ދުރުހެލިވުމަށް ހިތްވަރުދިނުން ކަމަށެވެ.

އެހެންނަމަވެސް އެމީހުންގެ ފަރާތުން އެކަން ނިންމުމަކީ ސަރުކާރުން ކުރަން ޖެހޭ ކަމެއް ނޫން ކަމަށް ފައްޔާޒު ވަނީ ވިދާޅުވެފައެވެ.

އޭނާ ވިދާޅުވީ މި ފެނިގެންދަނީ ރައީސް ޑރ. މުހައްމަދު މުއިއްޒު އާއި މި ސަރުކާރުން ރައްޔިތުންގެ އަމިއްލަ ޚިޔާރުތަކަށް އަތްގަދަކުރުމުގެ ބާރު ލިބިފައިވާކަމަށް ޤަބޫލުކުރާތަން ކަމަށެވެ. އަދި މިކަމާ ވަރަށް ކަންބޮޑުވާ ކަމަށް ފައްޔާޒު ވަނީ ވިދާޅުވެފައެވެ.

The government's role is to raise awareness, encouraging individuals young or old to quit smoking or refrain from starting. However, it has no business making that decision for them. It is deeply concerning that President Muizzu and his government seems to believe it has the… https://t.co/GZ17gTa3c2

— Fayyaz Ismail (@faya_i) April 3, 2025

ދުންފަތުގެ މައްސަލައަށް ހައްލެއް ހޯދުމަށް "ޖެނެރޭޝަނަލް ބޭން" ގެ ނަމުގައި މަސައްކަތްތަކެއް ކުރުމަށް ސަރުކާރުން ވަނީ ނިންމާފައެވެ.

މި މަސައްކަތްތަކުގެ ތެރެއިން ކަމާބެހޭ ފަރާތްތަކާ މަޝްވަރާކޮށް، ދިރާސާކުރުމަށްފަހު ކެބިނެޓް ކަރުދާހެއް ތައްޔާރުކުރުމަށް ހެލްތު މިނިސްޓަރަށް އިރުޝާދު ދެއްވާފައިވާކަމަށް ރައީސް ވަނީ މީގެ ކުރިން ވިދާޅުވެފައެވެ. އެގޮތުން، 3 ގޮތަކަށް ދުންފަތް ހުއްޓުވުމަށް ހުށަހެޅުއްވުމަށް ވިސްނަވާ ކަމަށް ރައީސް ވިދާޅުވިއެވެ.

މީގެ އިތުރުން ރައީސް ވަނީ ރާއްޖޭގައި ދުންފަތުގެ އިސްތިއުމާލު ކުރެވޭ އުމުރު ފުރާ ކަނޑައެޅުމަށް އާއްމުންގެ ހިޔާލު ހޯދުމަށްވެސް ހުޅުވާލާފައެވެ.