އެންމެ ބޮޑަށް ބިރުވެތިވެ ތަގުވާވެރިވާ މީހުންނަކީ އިލްމު އުނގެނި އެއާ އެއްގޮތަށް އަމަލުކުރާ މީހުން ކަމަށް މިއަދުގެ ހުތުބާގައި ބުނެފި އެވެ.

މިއަދުގެ ހުތުބާގައި ބުނީ މާތް الله އިލްމުވެރީންނަށް ހާއްސަ ކަމެއް ދެއްވާފައިވާ ކަމަށެވެ.

އަދި ނަބީބޭކަލުން މީސްތަކުންނަށް ވާރުތަކުރެއްވީ ޢިލްމުކަން ފާހަގަކޮށް ހުތުބާގައި ބުނީ ނަބީބޭކަލުންގެ ވާރިސުންނަކީ ވެސް އިލްމުވެރިން ކަމަށް މިއަދުގެ ހުތުބާގައި ބުންޏެވެ.

ހުތުބާގައި އިތުރަށް ބުނި ގޮތުގައި އިލްމުވެރިޔަކު މަގުފުރައްދަން ޝައިތާނާއަށް ފަސޭހައެއް ނުވާނެ އެވެ. އަދި ލިބިފައިވާ އިލްމުގެ މަތީގައި ސާބިތުވެ ހުރެ، އަނެކުން ވެސް ހެޔޮ މަގަށް އަޅުވަން އިލްމުވެރިޔާ މަސައްކަތް ކުރާނެ ކަމަށް ވެސް ހުތުބާގައި ބުނެފައި ވެއެވެ.

"މާތް اللهއަށް އެންމެ ބޮޑަށް ބިރުވެތިވެ، ތަގުވާވެރިވާ މީހުންނަކީ، އިލްމު އުނގެނި އެ އިލްމާ އެއްގޮތަށް އަމަލުކުރާ މީހުންނެވެ. އެ މީހުން މާތްﷲ އަށް ތަގުވާވެރި ވެއެވެ." ހުތުބާގައި ބުނެފައި ވެއެވެ.

ހުތުބާގައި ބުނީ ދީނީ އިލްމު އުނގެނުން، ކޮންމެ މުސްލިމަކަށް ވެސް ވާޖިބުވެގެންވާ ކަމަށާއި ދީނީ އިލްމު އުނގެނުމަށް ކީރިތި ރަސޫލާ ބާރުއަޅުއްވާފައިވަނީ ވެސް އެހެންވެ ކަމަށެވެ.

"މާތް ނަބިއްޔާގެ އިރުޝާދުފުޅުތަކަށް ތަބާވެ ދީނުގެ އިލްމު ލިބިގަތުމަށް ގަދައަޅައި މަސައްކަތް ކުރާށެވެ! އެ ކަމުގެ މާތް ދަރަޖައާއި ހެޔޮކަން ލިބިގަންނާށެވެ! އެއިން ދުނިޔެއާއި އާހިރަތުގެ މަގު އާރާސްތުކުރާށެވެ!" ހުތުބާގައި ބުނެފައި ވެއެވެ.